Italy ngamtu England-in Euro an khel dawn

Euro 2024 khel turin England an inpettling ta - Three Lions hian Germany 'ticket' nei turin Italy chu 3-1 in an hneh a, Wembley Stadium ngeia Italy hneh chunga Euro khel tura inpetkai hi an tan a hlu bik.

Azzurri tan Gianluca Scamacca chuan goal hmahruai khung mah se, Harry Kane goal hnih leh Marcus Rashford-a goal hmangin England-in an chhanglet a, 3-1 in hnehna an chang.

England hian match hnih khelh tur la nei mah se point 16 hmuin an tlang chiang tawh a, group C-a hmun ruak pakhat dang chu Ukraine leh Italy ten an inchuh a ṭul dawn.

Italy hian match ruk aṭangin point 10 an nei mek a, Ukraine-in point 13 neiin pathumna an ni - match khatin an khel tam thung. Champion lai Italy-in an nomawi kawl lai humhim tura Germany an pan theih dawn leh dawn loh a la chiang lo.

Point a tawk

England-in Euro qualifier an hman ṭhat avangin group stage match tawp lamah an dinhmun a ṭha tawh viau a, Thawhlehni zana Italy nena an intawn hma hian tlang turin point khat bak an mamawh lo.

Mahse, Wembley Stadium-a thawm ring tak karah England an chesual a, West Ham striker hlui Scamacca chuan minuyte 15-na lekah hmahruaina goal a khung a, Euro 2020 final-a England an lo velh tawhna khelmualah Italy-in chak an tum.

November 1977 hnua mahni mual ngeia Italy la hneh miah lo England dinhmun a ṭha lo a, fan-ten Wembley Stadium-ah a vawi hnih nana ṭah nawn an duh lo - fan-te duhna hriain England player-te an ngawi hlen lo.

Minute 32-naah Jude Bellingham chuan penalty hlawh chhuakin, Bayern Munich striker Harry Kane chuan goal-ah a chantir a, goal dang lut loin chawlhlawk hman a ni.

An chak chiang

Second half-ah England-in goal hnih an khung a, Italy lam hian an khung ve tawh lo. Minute 57-naah Manchester United tana season hmang ṭha lo Rashford chuan rintlak a la ni reng tih pholangin an goal hnihna a khung.

Kane pawh a awm mai mai bik lo. English striker ṭha mi hian minute 77-naah a belhchhah ve leh a, Italy-in a chhanletna tur an neih tawh loh avangin si phur hmasa zawk England an chak daih a, Italy an hawihai - Kane hian ram tan match 87-ah goal 61 a khung tling ta a, Three Lions tana goal khung hnem ber a nihna record chu a belhchhah zel.

England-in hnehna an chan avangin tun qualifier-a Italy nen an inkhelh vawi hnihah an chak ve ve tihna a ni a, Naples khawpuia inkhelah khan 2-1 in an lo chak tawh.

Italy tan beiseina a la thi lo a, match hnih la khelh tur awmah Ukraine nen hmun ruak pakhat an inchuh dawn. Ukraine hian match khat chiah an nei tawh thung a, November 20-ah Italy hi an mikhual ang - Euro khel tur zawk zawnna ang hial a ni thei ang.

Bellingham a vul

Real Madrid-a season duhawm tak hmangtu Jude Bellingham-a'n ram tan pawh season ṭha tak a hman chhunzawm zel a, England tan Three Lions lakah a khel ṭha lehpek hle - goal hnih chu a thawhchhuah a ni.

Penalty aṭanga Kane-a goal khung chu Giovanni di Lorenzo-a'n Bellingham a lo tihtluk avanga a chawi a ni a, Rashford-a goal khung tur chu Real Madrid midfielder hian a siamsak bawk.

Kum 20 mi Bellingham hi a taima a, a thawkrim a, team tan theihtawp a chhuah. A rilru a paukhauhin a huaisen a, a puitlin êm avangin kum 20 mi lek a ni tih hi rin a harsa zawk hial.

Minute 85-naah Jack Grealish chuan Bellingham hi a thlak a, Wembley Stadium-a fans 80,000 chuang kalkhawmin Bellingham zahna lantir nan ding chunga kut bengin an thlah - team tana tha thawhhlawk ber hi an hai lo.