Mizoram hmaa ding tur Sikkim

National Football Championship for Santosh Trophy-ah Mizoram chuan tukin zing dar 8:30 hian Sikkim an hmachhawn dawn. Lalsangzuala Hmar hoten final round an la beisei laiin Sikkim erawhin beisei tur an nei tawh lo.

Sikkim chu

Covid-19 zawh hnua Santosh Trophy khelh ṭan leh a nih khan qualifying hi zone hmanga khelh a ni a, Sikkim hi West Bengal leh Chattisgarh nen East Zone group B-ah an awm.

Sikkim leh West Bengal hian 2-0 ve vein Chattisgarh an hneh a, a tawpah an pahnih hian an inkhel. West Bengal-in 1-0 in hnehna an chang a, Sikkim erawh an tla thung.

Nikum khan Sikkim hi final hial lut thei Meghalaya bakah Odisha, Telangana, Pondicherry leh Andaman & Nicobar te nen group khatah an awm.

Sikkim hian Meghalaya an chelh thei a; Telangana, Pondicherry leh Andaman & Nicobar te hneh mah se inelna thlengtu Odisha an hneh lo. An group-ah pathumna an ni a, final round khel turin an tling pha lo.

Vawi hnih chak lo

Sikkim hi match hmasa berah Uttarakhand nen an inkhel a, hun rei zawk inkhel tawk mah se hun tawp lamah an tha an thlah. Corner kick aṭangin Shashank-a'n minute 77-naah Uttarakhand tan chakna goal a khung.

Match hnihnaah Sikkim-in Services an hmachhawn a, team pahnih an inthlau hret. Ruahsur vanga ground nalah phaitual hnima khel ṭhang Services-in first half-ah goal thum an khung a, second half-ah goal a luh belh lo.

Sikkim hi match hmasa pahniha an chak loh avangin final round luh beiseina an nei tawh lo. Chutihrualin Services laka goal thuma an hnufual hnuah tha thlah loin a tawp thlengin an ṭang. An mualpho tur hliah khuh nan Mizoram laka point an hlawhchhuah hi a pawimawh hle.

Chak a pawimawh

Nikum khan Mizoramin a thlengtu Kerala an hneh lo a, an khingpui dang an hneh vek. Mahse, Mizoram hi goal difference vangin pahnihna zinga tiṭha pathum zingah an tel pha lo.

Kuminah Mizoramin Services hneh loin bul an ṭan a, goal difference a pawimawh leh turah a ngaih theih. Mahse, kuminah erawh Mizoram awmna group E hi a khel tlai ber an nih avangin group dang result a hriat kim thuak tawh.

Mizoram tan goal difference a pawimawh ber a ni lo a, an match khelh hmabakah Sikkim, Uttarakhand leh Pondicherry te an hneh chuan an tling dawn. Chutihrualin an chak vek lo a nih chuan an tla thung ang.

An dam ṭha

Damlohna vanga Sikkim hmachhawn thei lo R. Malsawm-tluanga a dam tawh a, training a zawm tawh. Mizoram Police midfielder hian bul a ṭan kher ang em, tih erawh a la chiang lo thung.

Dadra and Nagar Haveli and Daman and Diu an hmachhawn ṭumin formation thar 3-4-3 an hmang a, Sikkim lakah defence pali an hmang leh tawh ang. Sikkim hian Uttarakhand leh Services an hmachhawn ṭumin goal an khung lo a, amaherawhchu attacking game an khelh avangin Mizoram tan fimkhur a ṭul ang.

Tlarhmaah Kelkang striker Lalkhawpuimawia (Mapuia) a che ṭha a, match hnih lekah goal li a khung. Mizoramin result ṭha an neih theih nan a thlawptu lamin goal an khung a pawimawh ang. Group stage ni mah se knockout anga ngaih theih a ni tawh a, tlarhnung an pawimawh dawn.

Pressure a sang

Covid-19 hnuah Mizoramin final round an la lut lo a, Santosh Trophy hi National Games-a football tel tur zawnna a nih avangin a pawimawh hle. Hei vang tak hian team chhungah pressure pawh a tam.

Mizoram manager K. Lalenghluna chuan, "Kan ṭang lutuk a, kan ṭang ulh deuh a ni. Ground ṭha tawk lo hi chhuanlam a tling a, amaherawhchu final round kan thleng lo a nih chuan kan ṭha tawk loah kan pawm mai a ngai. Kan kutah engkim a awm," tiin Vanglaini a hrilh a, Services leh DNH&DD lakah Mizoram ṭha ber an la inlan loh thu a sawi

Mizoram coach Lalsangzuala Hmar chuan, "DNH&DD laka 5-0 a chak kha result chhia a ni lo a, mahse kan khelh dan erawh a ṭha tawk lo. Kan thlenna hotel a nawm vang nge, kan tlan dan kha a dik tawk lo. Ei leh in thlenga kan insum a ngai, Mizoram tan a tawp thlengin kan ṭang dawn," tiin Vanglaini a hrilh.

Mizoram hian team dinhmun hriat nan inbukna an lei a, player zawng zawng an buk ṭha leh vek. Aizawlah player an buk vek tawh bawk a, kg khata weight gain tling player pali an awm. Training hnuhnung berah pawh ṭum dang aiin tlan a tam hret a, Sikkim lakah a rah ṭha seng theih an inbeisei a ni.