Kalvin Phillips hma hun chiang dawn

Manchester City midfielder Kalvin Phillips chuan a club ngaiah a khel reng dawn em, tih a sawi chiang thei lo a, hun rei vak lo hnuah a hma lam hun atan thutlukna a siam dawn tih a sawi.

England international Phillips hian beiseina sang tak nen Etihad Stadium a pan a, mahse hliam leh harsatna hrang hrang vangin beisei a phak lo hle. Tun season Premier League bikah pawh bench aṭangin vawi thum a lut a, rinrawl a ni phak lo.

Kum 27 mi Phillips chuan, "Ka hma hun ka tichiang dawn hnai, club tana inkhelh tam ka mamawh. Inkhelh tam ka mamawh thu hi keiman ka hria a, kan ram coach Gareth Southgate pawhin min hrilh.

"A tam thei ang ber inkhelh ka duh a, ka tan kawng pawh a inhawng ngei ang tih ka ring. Tun hnai kum khat leh a chanve chhunga ka chunga thil thleng erawh ka pawm thiam a ngai, ka tan kawng a inhawng lo a nih erawh chuan thutlukna ka siam mai a ngai ang," a ti.

Three Lions coach Southgate-a player duh zinga mi a ni a, Man City tana a inkhelh tam loh lai pawhin ram tan a khel phak leh mai ṭhin. Mahse, player ṭha dang an awm ve zel a, tun ang zel a nih chuan Euro 2024 khelh hunah an ram jersey hak phak loh mai pawh thil hlauhawm a ni.

Pep Guardiola enkawlna hnuaiah, season hmasa khan vawi hnih chauh league match-ah inkhel bul a ṭan. Spanish manager hian a ringtawk lo a, a player duhlai Rodri a dam a nih phawt chuan Phillips tan hmun a awm meuh lo.

Phillips hian tunah chuan Guardiola lung tih awi tumin training a neih chhunzawm leh a ngai tawh dawn. Premier League champion hian Inrinni zan dar 7:30 hian Brighton an mikhual dawn, an match hnuhnung berah Arsenal an ngam loh avangin insiamṭhat nghal an tum ang.