Messi hoin Argentina an chak zel

Lionel Messi leh an ram Argentina hian chawlh zai reng an rel lo, an hmaa ding apiang chu an hneh nghal zel a ni ber mai. Nimin zing khan world champion hian an mikhualna ramah Peru chu 2-0 in an hneh.

South American World Cup qualifier-ah Messi-a'n goal 31 a khung tling ta chiah - Peru laka a goal pahnih avang hian Luis Suarez-a'n Uruguay tana goal 29 a khung chu kalsanin, South America World Cup qualifier-a goal khung hnem ber dinhmun a luah nghal.

World number 1 La Albiceleste hi World Cup qualifier match vawi li an khelh tawhah an chak vek a, point 12 neiin table hmahruaitu an ni a, an hnuaiah hian - Uruguay, Brazil leh Venezuela ten point sarih ṭheuh an nei thung.

Messi a dam

Qatar rama FIFA World Cup an champion chiah khan Messi chuan football thleng chhuakah a inngai a, a aia sang leh thil dang hlenchhuah leh tur a nei tawh lo, kum 36 mi a nih tawh avangin nuam ti taka football khelh mai mai a duh tawh.

Inter Miami a pan a, nomawi a chawi leh nghal. Club tana boruak ṭhat lai takin a hliam a, tun hnaiah a inkhel tam tawk lo. Damkawr mai la ni mah se Argentina tan a feh chhuak ta tho a, a thiam dan a la pangngai reng.

Nicolas Gonzalez leh Enzo Fernandez te ball siamsak chu Messi hian chiang zetin a khung, box sir lam aṭanga ball kal chu laklawh nei miah loin a lai aṭangin a lo pet lut a, goal thumna pawh khungah inngai mah se VAR hman a nih hnuah an hnawlsak.

Goal hnih a khung a ni satliah lo - Messi hian khelmual chhungah football hmunawm a chhawp chhuak. Mual sir lamah Peru player pahnihin chep takin an hual a, tal chhuah theih tawh lohna tura ngaih aṭanga a rawn vir chhuah laite chuan fans thawm a ring hle.

Lungawina

Barcelona chher chhuah a ni a, a khelh thiam dan leh duh danin Catalan club hi an khel ṭhin - Messi hian amaha rinna nghattu club hi nomawi chawi theih zawng zawng a chawi pui vek, an ram Argentina tan pawh a thawnthu a danglam lo.

Messi chuan, "Ka khelh tawhna team zinga ṭha ber chu Barcelona kha a ni a, tuna kan ram team nen hian a inhnaih hle. In lungral leh nuamti takin football kan khel a, chumi avang chuan Copa America leh World Cup champion kan ni.

"Player ṭha tak tak kan nei a, kan khingpuite chu eng team nge an ni tih a pawimawh lo. In lungrual leh nuam ti taka kan khel zel thei a nih chuan tih theih loh a awm lo," a ti. Coach Lionel Scaloni pawhin Messi duh anga khelh a pawimawh thu a sawi bawk.

Messi hian Copa America 2024 chu a la khel dawn, a hnu lam zel erawh a sawi lawk thei lo. Coach Scaloni chuan a captain hian a duh a nih phawt chuan World Cup 2016 atan pawh a tan hmun a awm reng tih a sawi lawk tawh a ni.

Neymar a hliam

Nimin zing inkhel dangah Brazil chu Uruguay lakah 2-0 in an tlawm. World champion hmasa ber Uruguay tan hian Liverpool forward Darwin Nunez chuan goal khat a khung bakah De la Cruz khung tur a siamsak tel bawk.

Brazil tan an chak loh hi chanchin ṭha lo a ni, an forward ṭha Neymar chu hliam vanga zawh chhuah a ngai bawk - ram tana goal khung hnem ber hi mittui nen lak chhuah a ni a, a chawlh chen tur erawh sawi theih a la ni lo thung.

Brazil captain Casemiro chuan, "A hliam nat lutuk loh hram kan duhin kan beisei bawk, kan team tana player pawimawh a nih avangin a hliam hi a pawi kan ti takzet," a ti. A lan dan chuan Neymar hi a khup a hliam a, a club Al-Hilal tan pawh chânna lian tak a ni dawn.

Nimin zing inkhel dangah Venezuela chuan Chile 3-0 in an hneh a, Paraguay chuan an mikhual Bolivia 1-0 a hnehin Ecuador chu Colombia nen 0-0 in an inhnehtawk thung, ram 10 inel zinga paruk an tling nghal dawn, pasarihnain playoff an khel ang.