Second round-ah Sindhu a lut

Badminton inelna - Denmark Open Super 750 badminton tournament neih laiah, hmeichhe player PV Sindhu leh Aakarshi Kashyap ten second round an luh laiin, mipa player Kidambi Srikanth leh Lakshya Sen te erawh an chak lo.

Nimin inkhelah Olympic medal vawi hnih dawng tawh Sindhu hi world number 28 Kirsty Gilmour nen an inkhel tawk hle, minute 56 an inbeih hnuah Sindhu hi 21-14, 18-21, 21-10 in a chungnung ta zawk.

India nula pakhat zawk Aakarshi pawhin world number 26 Li Yvonne 10-21, 22-20, 21-12 in a hneh a, a match lehpekah chuan Thai nula Supanida Katethong nen an intum ang - Sindhu hian Gregoria Mariska Tunjung a tum leh thung dawn a ni.

Kar hmasa lawka Arctic Open semifinal kheltu Sindhu hian tun hmain Mariska Tunjung hi vawi riat a hneh tawh a, ṭum hnih a ngam lo thung. Tun ṭumah hian chak zawk tura rinkai a ni ang.

Mipa singles inelna lamah Srikanth chuan world number 22 Weng Hong Yang chu 21-19, 10-21, 16-21 in a ngam lo a, ani ang bawk hian Sen-a pawhin Kantaphon Wangcharoen chu 16-21, 18-21 in a hneh lo, hneh nei loin an zinkawng a tawp nghal a ni.

Asian Games gold medalist Satwiksairaj Rankireddy leh Chirag Shetty te inkawp chu India tan medal beiseina ni mah se, hun tepter tawh takah doubles player pahnih hi an inhnukdawk. An khingpui tur Ong Yew Sin leh Teo Ee Yi te chu inkhelh hah ngai loin an chak.