Silly Point: BARAKHAIH

Infiamna khawvel, a bik takin World Cup level-ah pawh hian result mak tak tak leh rin loh zawk chak ta daih ang hi hmuh tur a awm fo a. Nikum FIFA World Cup-a Saudi Arabia-in Argentina an han hneh ringawt maite kha mitthlaa lo lang hmasa zinga mi a ni. Kumin ICC World Cup-ah pawh a bang bik lo a, ni hnih chhungin Barakhaih inkhel pahnih kan hmu ta der a, Afghanistan-in champion lai England an sawp hrep thu chu kan lo thai lang tawh a, Netherlands-in thawhleh zana Dharamshala a, champion tura rinkai ber zinga mi South Africa an han hneh leh ringawt erawh thilmak a tling ngei e.

Irhfiak leh Proteas

Cricket khawvela ram ropui leh sang zinga awm thei reng, World Cup lo inherchhuah apianga champion tura rinkai mah se beisei pha lo ziah, Silly Point hmasa lama 'Irhfiak ching' tia kan lo sawi tawh Proteas ho hi kan ṭawng chhiat chu a ni em lo turah ngai ila. Test khel pha lo ram Netherlands laka dawl zawra an zawr erawh a mak a ni e.

Bowlers vawm kawh leh spin lutuk tumah an neih lohna chu, a discipline ṭha zawnga hmang ṭangkai thungin, Quinton de Kock leh Rassie van der Dussen-a te an han vawm hlum ta mai shockwave aṭang khan, South Africa kha an harhchhuak zo tak tak tawh lo a ni ber a. Hetah tak hian team lian zawk an la tum leh tur te chuan an lo hre kar tawh dawn - "Hemite pahnih hi kan vawm hlum vat chuan, team lu kan tansak a, a chanve zo ang kan ni" tiin. A tawi zawngin team tha zawk ni loin, a zana khel ṭha zawk Netherlands in South Africa an hneh a ni ber.

Saipui kal lai

Tun World Cup a inkhel 17 na tur chu vawin tlai hian rinkai ber leh thlengtu branch India leh a ṭhenawm Bangladesh ten Pune ah an khel dawn a ni a. Hriat lawk sa angin he khelmual zau lo tak leh mipui 37000 erh awrh lenna Pune khelmualah hian, batsman ten runs in vuakchhuahsiak festival an hmang leh turah ngai phawt ang.

Saipui kal lai ang maiin, Rohit Sharma leh a hote hian team pathum an tum tawhte chu an hnehsawh thei hle a, ṭum thum inlana vawi hnih hnehloh tawng tawh Bangladesh erawh, India laka an tlawm leh chuan semifinal boruak an hip ve theihna chance a tlem viau tawh ang.

Inkhel pawimawh

India tan vawi li inlannaa a zawna vawi li chak hi semifinal-a ke khing khat va rahna ang deuhah a sawi theih tawh ang a? Chutihrual chuan India hmar lam thlasik boruak inmung tan dai tlâin inkhel a nghawng na ang êm êm chuan he India khawthlang lam Pune leh Mumbai te hi chu nghawng lo mah se, dai erawh tla thei reng a ni.

Khawvel cricket tui mite za zela sawmkuain India hi an chak ring se, thilmak a ni lo a. Mahse, 2007 World Cup-a, Port of Spain khuaa, tuna India team head coach Rahul Dravid a captain na hnuaia, Bangladesh team laka an mualpho mai bakah, group stage paltlang lova World Cup an mangṭha ṭum kha, India fans tamtak zingah hian la theihngilh thei lo an awm nual ang.

Sawi tawh angin, tunkar chho hi barakhaih inkhel a tam riau, Bangladesh hian India hi barakhaih ve thei tak maw?