Denmark-in beisei an la nei zel
Euro 2024 khel turin Denmark pawhin beiseina an nei ve zel a, San Marino chu khualmualah 2-1 a hnehin, table-a an dinhmun an sawh nghet zel - Denmark hi group H-ah pahnihna niin point 19 an hmu a, hmahruaitu Slovenia nen point 19 ve ve an nei.
Denmark tan Manchester United forward Rasmus Hojlund chuan minute 42-naah goal hmahruai a khung a, rin loh takin San Marino tan Alessandro Golinucci chuan minute 61-naah si phurh sutna goal a khung.
San Marino goal khung hi Euro qualifier-a kum li hnua an ramin goal an khung ve leh hmasak ber a ni a, World Cup 2022 qualifier hnua competitive match-a goal an khung leh hmasak ber a ni bawk - kum 2021 khan World Cup khel tur zawnnaah Poland chuan 7-1 in an sawp a, Nicola Nanni chuan a khung ve a ni.
Denmark lakah pawh rin loh takin San Marino hian si phurh an sut a, mahse, FIFA ranking-a 207-na hi an ṭang tlang thei lo. Denmark tan Yussuf Poulsen chuan minute 70-naah khung ve lehin, a tawpah Denmark an chak.
San Marino erawh Euro qualifier match 84 an lo khelh ve tawha vawi 83 an tlawmna a ni a, kum 2014 khan Estonia chu goal khung loa inhnehtawkpuiin, a bak zawngah chuan an tlawm vek a ni!
Group H-ah San Marino hian table mawng ber luahin, point an la nei lo a, Denmark ang thoa point 19 hmutu Slovenia chuan hma an hruai mek - anni hian Thawhlehni zan inkhel dangah Northern Ireland chu 1-0 in an hneh.
Slovenia tan Adam Cerin chuan freekick mawi bik hmangin inkhela goal awmchhun a khung a, Northern Ireland lamah rawlthar midfielder Shea Charles chuan minute 58-naah 'red card' a hmuh avangin thawhleh an harsat tawh.
Group H-ah hian pathumna Kazakhstan pawh an beisei a la bo bik lo. Thawhlehni zan inkhel dangah Finland chu khualmualah lenchilhin, 2-1 in an hneh - Finland tan Robert Taylor chuan goal hmahruai khung zuk mah se Kazakhstan-in goal hnihin an chhanglet.
Kazakhstan tan hian Besiktas player Bakhtiyar Zaynutdinov chuan penalty hmangin si phurh a sut a, minute 89-naah chakna goal a khung zui - match hnih khelh tur la awmah point 15 an nei a, an khelh leh tur zingah San Marino bakah an elpui Slovenia an la tel a, a vawi khat nana Euro khel turin beiseina a la sang viau.