Zidane-a tan Champions League fiahna
Zanin dar 1:15-ah Real Madrid-in Champions League last -16 an khel dawn a, AS Roma khelmuala an inkhel tur hi Real Madrid manager thar Zinedine Zidane-a tan Champions League-a team a kaihhruaina hmasa ber tur a ni a - a awlsam dawn lo.
French football legend hian kum 2002 Champions League final-a Bayer Leverkusen an hma-chhawn ṭumin chakna goal a khung a, kum 2014-a Carlo Ancelotti-a hoa Real an champion ṭumin Italian manager thachhang dawltu a ni bawk.
Zaninah erawh khelmual chhunga ropui ṭhin Zidane-a'n khelmual pawn aṭangin a naute a ho dawn a, thachhang dawltu mai ni loin midangte kaihruaitu a ni tawh dawn - hei hi football khawvelin a hmuh chak chu a ni.
Chak mamawh
Zidane-a enkawlna hnuaiah Real-in La Liga match ruk an khel tawh a, tlawm hmel an la hmu lo. Mahse, Real hian league table-ah pathumna dinhmun an luah a, vawi khata khel tam zawk nichungin hmahruaitu Barcelona chu point liin an phak lo mek.
La Liga lamah Barcelona an chet ṭhat avangin Real tan umphak an harsa dawn a, Copa del Rey aṭanga an tlak tawh bawk avangin Champions League nomawi hi beisei an neihsanna ber a ni - Real tan chak loh a thiang lo ang.
Tun hnai dinhmun
Real-in Roma an lenchilh hmaa an match hnuhnung pa-nga-ah tlawm hmel an hmu lo. Vawi li chak zawkah ṭang-in vawi khat an khingpui an inhnehtawkpui.
An match hnuhnung pangaah Roma an duai bik lo. Italian club hian vawi li an khingpuite hnehin vawi khat a tlawm zawkah an
ṭang a, an hneh loh awmchhun erawh Italian club lian Juventus an nih avangin zanina club lian an hmachhawn tur hi an tan fiahna pawimawh a ni.
Thawnthu hlui
Zanina Real leh Roma in-khel turah hian Spanish club-in chak tura rin hlawh zawk mah se an record hlui enin chak chiang saa dah ngawt theih an ni bik lo.
Team pahnih hi Champions League-ah vawi riat an lo inhmachhawn tawh a, Real-in vawi li hnehna changin Roma vawi thum an chak a, vawi khat an inhnehtawk thung.
Team pahnih inhmachhawn hnuhnung ber erawh kum 2008 khan Champions Lea-gue last 16-ah tho a ni a, Sta-dio Olimpico leh Santiago Bernabeu-a inkhelah Roma hi 2-1 in a chungnung zawkah an ṭang ve ve a, inkhel pahnih belhkhawmah Roma hi 4-2 in an chak.
Team in ang lo
Champions League-ah Real-in sulhnu an nei ṭha a, tun season hi season 19 chhung a zawna last-16 an luhna a ni. Real hian Group A-ah PSG-te nena awm ho chungin hmahruaitu dinhmun an luah a, last-16 an lut.
Roma tan tun season hi kum 2011 hnua Champions League last 16 an luh lehna hmasa ber a ni a, Group E-ah Barcelona hnuaia awmin last 16 hi an lut. Italian club hian group stage-ah point ruk chiah hlawh chhuakin goal 16 chhuah mah se team dang chet chhiat zarah last 16 an lut a ni.
Zidane faktu Varane
Real Madrid defender Raphael Varane chuan an manager Zidane fakin, "Football hmangaihtu, attacking football khelh nuam ti em em coach a ni a, rang taka ball inpek kual a duh ṭhin. Player ropui tak a nih ṭhin bakah coach naupang tak a ni a, hei vang hian player-te nen pawh kan inpawhna a ṭha em em a ni," a ti.
Zidane-a'n zaninah hliam vangin a player pawimawh pahnih defender Pepe leh Welsh winger Gareth Bale-te a chhawr thei dawn lo.
Beiseina nen Keita
Roma midfielder pawimawh Seydou Keita chuan, "Barcelona tana ka khelh lai khan match pawimawh tak takah Real hi ka lo hmachhawn tawh ṭhin a, theihna sang tak kan neih avangin Luciano Spalletti hnuaiah chak theih ngei kan inbeisei a ni. Chak hi a harsa dawn tih ka pawm a, mah se theih loh erawh a ni lo," tiin a inringtawk hle.
AS Roma hian January thla khan an manager Rudi Garcia an ban a, zanina an inkhel tur hi manager thar Luciano Spalletti hnuaia an Champions League match hmasa ber tur a ni.
Roma tan an player tawnhriat ngah pahnih Francesco Totti leh Daniele De Rossi-te chu hliam vanga an chawlh reng hnuin zaninah inlan thei tura beisei an ni a, Roma an phur phah sawtin a rinawm.
Inkhel dang
Zanin inkhel tur dangah Champions League-a tawnhriat nei tlem pahnih Gent leh Wolfsburg an inhmachhawn dawn a, club pahnih tan zanina an inkhel tur hi Champions League last-16 an khelhna hmasa ber tur a nih avangin chak an tum ruh khawp ang.
Champions League group stage aṭanga Manchester United hnawtchhuaktu Wolfsburg leh Group H-a Zenit, Lyon leh Valencia awmna aṭanga last 16 lut Gent-te hi Belgian club khelmual Ghelamco Arena-ah dar 1:15-ah tho an inhmachhawn dawn a ni.