United-in Charlton chawimawi

Manchester United chuan Old Trafford Stadium-a mipui ṭhutna South Stand chu an club history-a goal khung tam ber Sir Bobby Charlton hmingin an thlak.

Kum 68-a upa Charl-ton hian 1953-ah United a zawm a, vawi 758 inlanin goal 249 a khung. United vice-chairman Ed Woodward chuan, "Bobby hi English football history-a player entawntlak ber a ni. Foot-ball player a ni a, palai
ṭha tak a ni a, pa zahawm a ni a, ṭanpui ngaite ṭanpui kawngah a entawntlak a, football leh Manchester United hmel timawitu a ni," tiin United legend chu a fak thiam hle.

Hming thlakna hun hi April 2-a Manchester United-in Everton an mikhual hunah neih tur a ni a, Charlton chuan chawimawina chu ropui a ti hle. United club director Charlton chuan, "Manchester United hian ka nunah hmun pawimawh tak a chang a, Theatre of Dreams (Old Trafford)-ah hian theihnghilh theih tawh loh tur hun chhin-chhiahtlak tam tak ka tawng a ni," tiin a sawi.

England-in 1966 FIFA World Cup nomawi an chawi khan Charlton hi player pawimawh a ni a, United hi league title pali a lakpui bakah 1968 khan European Cup a champion pui bawk. Mid-fielder chawl ta Charlton hi kum 1958-a Munich chhiatnaa dam khaw chhuak zinga mi a ni a, chhiatna rapthlak tak tun thlenga an la sawi zuiah hian player pariat lai an thi. Charlton hi a inkhelh hun laiin player
ṭha bik a ni a, thinrim thei lo hial anga sawi ṭhin a ni.