Jahar Das-a hnuaiah hmasawnna a awm em?

Aizawl FC-in Manuel Retamero an ban chungchanga an thuchhuah siamah I League match ruk an khelha corner kick vawi 58 an hmuhte goal-a an chantir theih loh chungchang an ziak tel. MPL champion hian statistics an ngai pawimawh tih a lang a, tun
ṭumah hian statistics hmangin Rajiv Gandhi Stadium, Mualpui bika coach thar Jahar Das leh Spanish coach hnuaia Aizawl FC khelh dan kan khaikhin ang.

Corner Kick?

Corner Kick hi goal khung theihna hun ṭha tak a ni a, team ṭha tehna atana hman erawh a fuh lo.

RG Stadium bikah Aizawl FC-in Retamero hnuaiah corner kick vawi 37 an hmu a, match khata 12.33 corner kick hmu ang zel a ni. Jahar Das-a hnuaiah MPL champion corner kick hmuh zat hi a chanve hlawkin a tlahniam a, Shillong Lajong nena an inhnehtawk ṭum khan vawi ruk chiah an hlawh chhuak.

Aizawl FC player-te pumrua a len tawk loh avangin Spanish coach-in corner kick-ah a player-te hnai teah a in pass tir a, corner kick an pet tam bawk avangin tihsual a lang chiang. Chutihrualin Jahar Das-a hnuaiah goal an la thun chuang lo.

Pass leh Ball Possession

Spanish coach hnuaiah Ai-zawl FC-in ball an chang tam a, chawhrualin an ball chan zat hi 60% a tling pha. Chu aia langsar erawh an ball in pass zat a ni a, match khata vawi 334 zel ball inpe kual ang an ni a, an pass dik zat percentage pawh 74% a tling pha hial.

Jahar Das-a hnuaiah an ball in pass zat a tlahniam a, vawi 295 ball inpe kualin vawi 214 an inpe dik. Chutihrualin pass dik percentage hi 73% a nih avangin ball inpek dik kawngah chuan a intluk tawkah a ngaih theih.

Goal?

Statistics-a a pawimawh ber chu goal a ni a, Spanish coach hnuai-ah Aizawl FC-in RG Stadium-ah goal hnih an khung a, Aizawlah point thum an hlawh chhuak. MPL champion hian Retamero hnuaia goal an khung loh ṭumin an chak lo ve ve.

Bengali coach hnuaiah Aizawl FC-in goal la khung lo mah se an pet goal loh ṭumah point an hlawh thung.

Insawifiahna

Ball pass zat chungchang sawiin Aizawl FC coach Jahar Das chuan, "Manuel kha a chhia ka tihna lam a ni lo a, amaherawhchu awmze nei loa ball in pass a tam. A hma zawngin ball an inpe tam lo a, a hnung zawngin ball an inpe fo. Tin, ball an inpekna tam zawk hi defensive third lam a nih avangin ball an inpek tam vang khan an khingpuite tlarhnung an ṭhiat lo," tiin Spanish coach hnuaia Aizawl FC attacking a nat loh thu a sawi.

Jahar Das-a thusawi hi statistics lamah a dikna chen a awm. Bengali coach hnuaiah Aizawl FC-in inpe kual tlem zawk daih mah se goal khung tuma an pet zat erawh a intluk tawk. Aizawl FC-in Lajong lamah vawi 14 an pet a, Spanish coach hnuaia chawhruala an pet zat nen a inang chiah.

Chutihrualin goal an khung miau loh avangin Bengali coach hnuaia Aizawl FC khelh dan hi fak theih a la ni lo. Lajong an khelh ṭumin Alfred Kemah Jaryan-a'n goal khung mah se referee tihsual vangin pawm a ni lo a, a bak zawng chu Lajong keeper Vishal Kaith tan dan a harsa lo.

Inrinni hian Aizawl FC-in RG Stadium-ah Mumbai FC an mikhual dawn a, MPL club hian foreign striker thar an neih hmel bawk avangin attacking game hmuhnawm zawk an khelh theih beisei a ni.