United academy hotu atan Nicky

Manchester United chuan an player hlui Nicky Butt chu head of academy atan an la lut.

United executive vice-chairman Ed Wood-ward chuan, "Nicky hi club thisen kai a ni a, academy hotu tur reng a ni. Hei vang hian academy hotu tur chungchanga thutlukna siam hi a harsa lo," tiin Butt chunga rinna an nghah ngam thu a sawi.

Butt hi United youth system chhuak a ni a, kum 1992 leh 2004 chhung khan club senior team tan khelin match 387-ah goal 26 a khung. English midfielder Butt hian United hi Premier League-ah vawi ruk a champion pui a, FA Cup-ah vawi thum a champion bakah UEFA Champions League-ah champion pui bawk.

Kum 41-a upa Butt chuan, "United aṭangin engkim kan zir a, academy kaihruai tura min ruat hi ka ngaihlu tak zet a ni. Manchester United tana khel tlak player chher chhuah hi kan tum a ni a, chona lian tak leh phurawm tak a ni," tiin UEFA Pro coaching licence kawltu chuan a sawi.

United academy hi Class of '92 vangin fak an hlawh hle. Tun hnaiah David Beckham, Nicky Butt, Ryan Giggs, Gary Neville, Phil Neville leh Paul Scholes te tluk pha ang chher chhuak tawh lo mah se tun hnai kum li chhungin academy chhuak player 15 senior team tan an inlan. Uni-ted rawltharte match khelh zat belhkhawm hi vawi 173 zet a ni a, a chhuanawm thawkhat hle.