Rafael Nadal-a'n Rio lam a hawi

World number 1 hlui Rafael Nadal chuan tunlaia hri leng mek 'Zika' chu a hlauh loh thu sawiin, tunkar chhunga neih tur Rio Open-ah inlan a tum.

Brazil khawpui pakhat a neih tur Rio Open-ah hian David Ferrer pawhin inlan a tum thu a sawi a, kum 33-a upa hian hrileng thehdarhtu thosi laka a him theih nan khawlaia a chhuah chuan kekawr tluan leh kawr ban tlawn a hak ṭhin thu a sawi. Spanish pahnih Nadal leh Ferrer te hi Rio Olympic mipa single khel turin an tling tawh.

Kum 29-a upa Nadal chuan, "Zika hi ka hlau hran lo a, zan lamah pawh khawlaiah pawh ka chhuak vak tho. Ka lungkham hran lo a, ka kai palh a nih erawh chuan a lungchhiat thlak hle ang," a ti.

Nadal chuan sawi chhun-zawmin, "Kawt-thlerah te hian mipui hi dan pangngain an kal chhuak a, thil hi a awmdan pangngai vekin a awm thoin ka hria. Pawnlam aṭanga an thlir ang ngawt chu a ni hran lo," tiin a sawi.

Tunlai khawvela hrileng ṭih bai awm ber zinga mi Zika hi Brazil aṭanga rawn darh chhuak nasa nia ngaih a ni a, a enkawl damna damdawi a la awm loh avangin in-fiam-mi ṭhenkhat chuan August thla a neih tur Summer Olympic-ah pawh kal an hreh thu an sawi tawh hial.

Grand Slam vawi 14 champion tawh Nadal hian Rio Open-a a match hmasa ber chu tukin dar 4:00 khan khelin Carreno Busta nen an inhmachhawn a ni.