David Moyes-a'n Van Gaal a vau

Manchester United manager hlui David Moyes chuan tun hnaia a dinhmun nghet lo anga an sawi United boss Louis van Gaal chu Old Trafford-ah cham chhunzawm zel a duh a nih chuan Champions League khelh tum turin a ti.

Sir Alex Ferguson-a'n amah thlaktu tura a thlan Moyes hian kum 2013 khan United a zawm a, mahse United-ah beisei a phak loh avangin thla riat hnuah a hna aṭangin ban a ni.

United-a chhuahsan laia table-a pasarihna nihpuitu Moyes chuan, "Manchester United hian Champions League an khelh a ngai a, club lian an nih miau avangin Europe-a inelna sang bera khelh hi an duh a ni," a ti.

Everton boss hlui chuan sawi chhunzawmin, "Media lam hian Louis van Gaal hi in bawh nasa lutuk ve bawk a ni. United manager aṭanga ban ka nih khan LVG hi mi zawng zawngin in fak a, mahse khatih laia faktute bawk khan tunah ban in duh leh si," tiin media-te chu na takin a khak.

Scottish manager chuan, "Mahse, Manchester United kan enkawl chuan heng zawng zawng hi tawrh huam a ngai. Tun thlenga ka dinna ngai reng erawh Manchester United enkawl tur dik tak chu kei hi ka ni," tiin a inringtawk hle.

Moyes chuan United chu a chungah aia Van Gaal-a chunga dawhthei zawka an sawina chu sawilang nghalin, "Manchester United-in min ban chhan chu engdang a ni lo. Chak an mamawh zat ang ka chakpui theih loh vang a ni mai," tiin tumah a sawisel duh lo.

David Moyes hian 2013-14 season-a United a kaihhruai laiin league match 23 a enkawl hman a, vawi 12 hnehna changin vawi li an khingpuite an inhnehtawkpui a, vawi sarih tlawm hmel a hmuhpui thung.

An khingpuite lamah goal 38 khungin goal 27 an chhuah a, point 40 hlawh chhuakin top four an phak lohna chu point ruk a ni.

Van Gaal-a'n tun season-a league match 23 hnuah United hi vawi sawm chiah hnehna a chanpui thei a, vawi sarih an khingpuite inhnehtawkpuiin vawi ruk an tlawm thung. An khingpuite lakah goal 28 an khung a, goal 21 chhuahin top four chu point ngain an thlau.

Moyes-a hnuaiah Cham-pions League quarterfinal an inpet kai laiin Van Gaal-a hnuai-ah erawh group stage aṭangin hnawhchhuah an ni thung.

United hian Inrinni khan Pre-mier League table mawngphah club Sunderland chu 1-0 in an hneh lo a, Van Gaal-a dinhmun a derthawng zual hle.