Dubai-ah Serena leh Kerber inlan thei lo

Kumina Grand Slam tournament hmasa ber Australian Open champion Angelique Kerber leh world number 1 Serena Williams te chu tun kar chhunga khelh tur Dubai Open-ah inlan tura ngaih ni mah se dam lohna vangin an inhnukdawk.

WTA Dubai Open buatsaihtute chuan seeded pakhatna Serena chu a dam loh vang a nih thu leh seeded pahnihna Kerber chu hliam tenau a neih vang niin an sawi.

American Williams hian kum 2013 leh 2015 khan Dubai Open hi a lo khel lo tawh bawk. Kum 28-a upa Kerber hian Australian Open final-ah Serena hi a hneh a, German star hian a vawi khat nan major title a la a ni.

Dubai Open-ah hian WTA player langsar Simona Halep, Garbine Muguruza, Carla Suarez Navarro, Petra Kvitova, Belinda Bencic, Karolina Pliskova, Roberta Vinci leh Svetlana Kuznetsova te chu an inlan dawn thung.

Williams leh Kerber an inlan theih dawn loh avang hianchampion lai Halep chu seeded pakhatna a ni chho dawn.