Wenger-a'n United zawm a phal lo - Debuchy

Arsenal defender Mathieu Debuchy chuan January tranfer tawpni khan an elpui Manchester United lama loan-a kalna hun ṭha a neih chu manager Arsene Wenger-a'n a a remtih loh thu a sawi.

France international hian Hector Bellerin a tluk loh avangin Gunners-ah khelhna hmun a chang lo a, Euro 2016-ah an ram aiawha khelh ngei a duh si avangin a khelh tam theihna hmun tur a zawn a ngai a, an ram club Bordeaux chu season tawp thleng cham turin loan-in a zawm a ni.

Kum 30-a upa Debuchy chuan, "Old Trafford-ah kal thei turin hun ṭha ka nei a, mahse coach nen kan sawi dun hnuah kan elpui team zawm chu a remti lo," tiin a sawi.

Debuchy chuan French TV channel pakhat Canal-in an kawmnaah he thu hi sawiin, "Hun ṭha ka hmuh ka chhawr ṭangkai theih loh avangin coach chungah pawh ka lungawi chiah lo," tiin Wenger-a thutluknaa a lawm loh thu a sawi lang.