Santosh Trophy qualifier 2016 Mizoram vs Manipur tum 2 a awm!
Santosh Trophy North East Zone Qualifier-ah Arunachal Pradesh an inlan loh avangin Mizoram leh Manipur-te Group A-a hmun pakhat inchuhin vawi hnih an inkhel ang.
Hmarchhak football khel thiam pahnih hi February 19 leh 21-ah an inkhel dawn a, minute 180 chhunga goal khung tam zawkin Nagpur-ah final round an khel ang.
Inbuatsaihna
Santosh Trophy Qualifier hi Lammualah khelh tur niin February 18-ah khelh ṭan tur a ni a, February 23 thleng a awh ang.
Inbuatsaih dan chungchang sawiin organising chairman Lalruatsanga Tochhawng chuan, "Inelna lian tham thlen hi Mizoram football tan hlawhtlinna a ni a, chutih rualin hotel-te kan la neih ṭhat tawk loh avangin mikhual tam tham thlen hi chu a hautak ṭhin khawp mai. Mizoramin hma a sawn chhoh mek avangin football activities a tam a, MFA lam pawh a indaih tak tak theih loh. Football hmangaihtute puihna hi kawng hrang hrangah kan mamawh reng a, football tana pen chhuak turin kan insawm nghal bawk," tiin Vanglaini palai a hrilh.
MFA finance secretary ni bawk Ma-ruata chuan, "Santosh Trophy hi India ram state-te tana football inelna lian ber a ni a, Mizo mipui pawhin kan ngaih hlut kan ring. Qualifier-ah match pariat a awm a, mi zawng zawng en theih turin en man hi Rs 30 chauh tih a ni a, inkhel en vek turin Mizo mipui kan sawm a ni," a ti.
Thawhlehni khan Megha-laya, Tripura leh Nagaland te an rawn thleng a, nimin khan Assam leh Manipur te an rawn thleng leh bawk.
Mizoram team lam
Mizoram leh Manipur te hian January 31, 2014 khan Lammual khat veka mipui pungkhawm hmaah qualifier group match hnuhnung ber an lo khel tawh a, chak mamawh Mizoramin minute 82-naa R. Laldanmawia leh hun pek belhah captain Zico Zoremsanga goal hmangin hnehna an chang hram.
Kum hnih hnuah football khel thiam state pahnih hi Lammualah bawk an intawng leh dawn a, Aizawl FC-in I League an khelh takah chuan mahni muala khel tur ni mah se Mizoram hi team ṭha zawka dah theih a ni lo.
Mizoram manager Lalbiak-zuala chuan, "Manipur nen kher kan awm dun hi chu a fuh lo a ni. Anni hi Mizoram er pha ber tura ngaih an ni a, chuvangin kan inkhel pawh a hmuhnawm ang. Vawi hnih kan khelh dawn avangin team ṭha zawkin final round an lut ang," tiin Vanglaini palai a hrilh.
Mizoram leh Maniput-te chiah hi hmarchhak aṭanga Santosh trophy-a champion thei an ni.
Mizoramin kum 2014-a Santosh Tro-phy an champion ṭuma mana-ger BZ-a chuan sawi zuiin, "Mizoram Football Association-in kan mamawh angte min pe char char a, kan inbuatsaihna pawh a ṭha. Player pahnih inhliam kan nei nachungin Santosh Trophy khel tur hian kan inpeih tawh. Ka duh ber chu Mizo mipuiin Lammualah min rawn ṭawiawm se tih hi a ni," tiin mipui ṭawiawmna a ngen.
An inbuatsaih dan sawi zauin BZ-a chuan, "Kan hun neih ang kan hmang ṭha a, Dr Mapuia (MSSC) kaihhruaina angin diet awmze nei thlapin team kan enkawl a, doctor thu rawn angin food supplement kan ei bawk. Mizoram tan theihtawp kan chhuah dawn a, final round thlen ringawt hi kan lungawina tur a ni lo a, Mizoramah champion nomawi hawn leh ngei kan duh," tiin champion nawn ngei an tum thu a sawi.
Mizoram squad-ah player 20 an awm a, inhliam vanga training mumal zawm thei lo midfielder pahnih R. Laldanmawia leh Lalramtharmawia te chu inelna ṭan huna chhawr theih tura an dam hman beisei a ni.