Mizoram beiseina siamtu Mapuia

National Football Cham-pionship for Santosh Trophy aṭangin tla thei dinhmunah Mizoram an ding a, minute 80-naah pawh goal a la lut lo. Lalsangzuala Hmar hote hi an chak zo lo a nih chuan an tla dawn. Minute 83-naah Kelkang pa Lalkhawpuimawia a rawn inlar a, Sikkim lakah chakna goal a khung.

Guru Nanak Dev Univ Sports Complex, Amritsar-ah Mizoramin final round luh beiseina nei chhunzawm turin Sikkim 1-0 in an hneh. Match khelh hmabakah Uttarakhand leh Pondicherry an hneh chuan Arunachal Pradesh-ah an zin thei ang.

Game Plan chu

Mizoramin Dadra and Nagar Haveli and Daman and Diu lakah defender pathumin bul an ṭan a, Sikkim erawh an goal bawh a nat tawh avangin defender pali an hmang leh ta thung.

Final round lut turin Mizoramin goal an mamawh a, striker pahnih hmangin 4-4-2 formation an hmang. Midfield-ah R. Malsawmtluanga a la damloh avangin a la inlan thei lo a, player thawkrim pahnih H. Lalbiakthanga leh Johny Lalremruata ten mawhphurhna an la.

Amritsar-ah khua a ṭha tawh a, ground a nal tawh lo. Chutihrualin ruahsur laia inkhel a awm ṭhin avangin khelmual erawh a mam lo hle. Mahse, inkhelh hmasak ṭum aiin khelh a nuam zawk a, Mizoram tan malsawmna a nih rualin artificial turf-a khel ṭhang Sikkim tan pawh chanchin lawmawm a ni.

A goal thei lo

Mizoramin nung takin inkhel bul an ṭan a, PC Lallawmkima'n chance ṭha hmasa ber a hlah. Sikkim lamin khelh dan nghet ṭha tak an nei a, passing game khelin defender leh goalkeeper inkar a zau.

Mizoramin hmun ruak lai chu hman ṭangkai tumin ball an vawrh lut a, winger pahnih Lallawmsanga leh VL Thanga te vanneih ṭum a ni lo. LS-a'n chance ṭha bik a hlah a, Mapuia pawhin goal-ah ṭha zetin pet mah se keeper Pranub Limboo-a'n a dansak.

Sikkim erawh Mizoram keeper F. Lalmuanawma tan hna an siam meuh lo a, chutihrualin defender Lalrinchhana Tochhawng, Lalhmunmawia, Lalrinzuala Khiangte leh Lalmawizuala te erawhin hna an ngah thung.

Khawpui a ri

Second half-ah pawh Mizoram bawk an chungnung a, chance ṭha bik insiam erawh an harsat. Bench aṭanga lut Laltlanzova'n a hun ṭha neih hmasak chu a pet over a, ball a sawh nasat avangin pet sual hi a awl ve bawk.

Mizoramin chance ṭha bik an insiam a, LS-a pass chu Mapuia'n goal ruakah a hlah. Sanga hote an vanduai turah a ngaih theih. Mahse, Mizo player-te an tlawm duh lo a, Mawizuala'n harsa taka a petchhuah hram chu Zozoa'n um lutin a ball pet chu keeper-in dang mah se a per chu Mapuia'n minute 83-naah a khung.

Mapuia hian tun inelnaah match tinah goal a la khung vek a, match thum aṭangin goal ruk a khung tawh. Sikkim-in goal an chhuah hnuah risk lain na takin an nawr a, captain Rinchhana hoin Mizoram an ṭang tluan.

Mamawh chhangtu

Mizoram manager K. Lalenghluna (Maenga) chuan, "Kan vanduai turah ka ngai a, bei a dawng hman hle. Mahse, Pathianin Mapuia kaltlangin goal min pe a, kan duh ber hnehna kan chang. Chapo thei kan ni lo a, final round thleng turin rim lehzuala kan thawh a ṭul a ni," tiin Vanglaini a hrilh.

Mizoram coach Lalsangzuala Hmar pawhin, "Ka naute chungah ka lawm hle. An theihna zawng zawng an chhuah a, vannei turin kan thawkrim. Game tinah hmasawnna hmuh tur a awm a, Pathianin kan ṭawngṭaina a chhang a ni," tiin a sawi ve bawk.