Ben Stokes a dam tawh

England cricket team ṭantuten chanchin lawmawm hriat tur an nei a, Cricket World Cup khelh meka hliam vanga inlan thei lo Ben Stokes a dam tawh - Inrinnia South Africa nen an inkhelh hunah a inlan thei tawh dawn.

Stokes hian a khel bawrah hliam a nei a, England match hmasa pathumah a inlan theih loh phah - heng match thumah hian England hi vawi khat chiah an la chak a, champion lai hian New Zealand bakah rin loh takin Afghanistan an ngam lo a, Bangladesh chu an hneh awmchhun an la ni.

Kum 32 mi Stokes chuan, "Dam vat a, team tana inlan leh thei turin ka thawkrim êm êm a, training-na lamah pawh theihtawp ka chhuah chhunzawm zel ang," a ti.

England hian South Africa an hmachhawn hunah hnehna an chang zo lo a nih chuan semifinal beiseina a tlem lehzual dawn a, an hmabak match ngaah an chak vek a ṭul tawh ang.

South Africa pawh hian an match hmasa pahnihah team ṭha Sri Lanka leh Australia hneh mah se, an match thumnaah rin loh takin team nem ber ang hiala ngaih Netherlands an ngam lo - England nena an intawng tur hi a hmuhnawm dawn.

England Test captain Stokes chuan, "Match thum chauh kan la khel a, inthlahdah hun a ni lo. Hmabak match kan la nei nual a, tunah hnual mah ila World Cup-a cricket match-ah kan tlawm ve a ni mai.

"Midang pawh an la tlawm leh vek dawn a, rang taka kan insiamṭhat hi a pawimawh ber chu a ni mai. Kan khel ṭha lo a ni, tih kan inpawm a ṭul rualin, match khelh tur tam tak kan la nei tih hriat tel a ṭul," a ti.

World Cup 2019-a England an champion ṭum khan Stokes hi final-ah player of the match atan thlan a ni a, kum 32 mi all rounder telin Three Lions hian inrintawkna an nei sang sawt ang.

Mahse, Stokes chuan, "He team hian anmahni tiphur turin mi pakhat lek an mamawh lo. Ka awm tak avangin thawklehkhatah kan ti ṭha thut dawn tihna a ni lo - miin an lo sawi ve a ni mai a, mahse, hetiang lam hi ka ngaihtuah a ni hran lo.

"England tan jersey ha a, khelmuala lut zawng zawng hi team hnehna min chanpui thei an ni vek a, a mimal taka tih theih nei vek an ni. Ka lo kir hi sawi vul chuk chi a ni lo," a ti a, a inngaitlawm thiam hle.

ODI match 108-a run 3,159 siam thei Stokes hian July 2022 khan ODI a chawlhsan hman a, World Cup 2023 khel tur hian a lo kir leh a ni.