Rolling Stones leh Barca thawk dun dawn!

English rock band lar The Rolling Stones leh Barcelona te an thawk ho dawn a, hei hi Barca leh streaming service Spotify thawhhona kaltlanga tih a ni.

Barcelona hian October 28 hian Real Madrid nen El Clasico an khel dawn a, football khawvela inkhel ngaihven hlawh ber ang hiala tam takin an chhalah hian Barca chuan Rolling Stones logo chuang jersey an ha dawn a ni - Mick Jagger-a'n Barca a ṭan dawn!

Rolling Stones chuan thuchhuah siamin, "Football ngaina êm êm tu kan nih avangin kan tan chuan chawimawina ropui tak a ni. He match ropui tak en tur fans tam tak ang thoin khelmuala inlan player-te ṭan tak chungin inkhel kan thlir dawn a ni," an ti.

Kum 1962-a din tawh Rolling Stones hian album thar 'Hackney Diamonds' an siam a, Barca chuan hemi lawm nana Rolling Stones logo chuanna jersey hak hi an rem ti a ni - Barcelona hmeichhe team pawhin November 5-a Sevilla hmeichhe team an hmachhawn hunah Rolling Stones logo chuanna jersey an ha ve bawk ang.

FC Barcelona Marketing Area vice president Juli Guiu chuan, "Spotify nena kan thawhhona zarah tun hi kan thleng a ni. Rolling Stones logo leh Barca jersey a kal ṭhiang tur hi khawvel hmun hrang hranga kan fan-te tan chuan thil lawmawm tak a ni.

"Music leh football hian thawhhona ṭha tak neiin, hmabak êng tak a nei a, he thawnthu kal zela thil thar kan belh ve thei hi kan lawm hle," a ti.

Spanish champion Barcelona hian tun season La Liga-ah match kua khel tawhin point 21 an nei mek a, hmahruaitu Real Madrid hian match kua tho khel tawhin, point 24 an nei mek thung - an inkarah point 22 neitu Girona an awm.

Barca leh Real elpui bera chhal theih Atletico Madrid chu palina an ni mek a, mahse, club pahnih aia match khata khel tlemin point 19 an nei.

International break avanga an chawlh vang vang hnuah La Liga hi zaninah khelh chhunzawm leh a ni dawn a, zan dar 12:30-ah Osasuna chuan Granada an mikhual ang.