Dortmund-in Sancho lak let an duh

Borussia Dortmund chuan Manchester United-a tla tlum lo, an player pawimawh Jadon Sancho chu thlasik transfer-ah laklet dan an ngaihtuah dawn niin khawthlang media-ten an tarlang a, nakkumah Bundesliga a khel a nih pawhin a mak lo ang.

Sancho hi United manager Erik ten Hag nen an inhmu thiam lo a, Red Devils tan tun season-ah match thum chiah a la khel. Kum 23 mi forward hi Ten Hag-a'n a chungchang a sawi danah a lungawi lo a, social media lamah a chhanglet.

English forward hi ngaihdam dil tura tih a ni a, mahse, ngaihdam dil a duh loh avangin Ten Hag-a'n United a enkawl chhung chu a inlan leh tawh a rinawm lo - Red Devils pawh hian hralh an pawi ti lo nia sawi a ni.

Dortmund hian vantlang hriatah Sancho laklet an tum loh thu sawi mah se, club chhungkua hrechiang ṭhenkhat chuan German club hian laklet an duh ngei niin an sawi a, a man a zir a ni thei bawk ang.

Sancho hian United-ah hian kara khatah £300,000 lai a hlawh a, Dortmund-ah kir se heti zat hlawh hi an pek theih kher a rinawm loh. Hei vang hian Dortmund hian season tawp thleng loan-a hawh phawt an duh nia sawi a ni a, mahse, United lam hian a nghet law lawa hralh an duh.

Chutihrual chuan Sancho hian Old Trafford-ah beisei a phak loh avangin a hlutna a tlahniam nasa a, kum 2021-a pound maktaduai 73-a Red Devils zawmtu hi a sang berah £40mtd baka hralh theih a nih a rinawm lo.

Dortmund bakah hian Barcelona leh Juventus hming pawh lam rik a ni a, mahse, Barca pawh hi sum lama talbuai mek an nih avangin sum tam tak senga Sancho lakluh chu an tan a harsa mai thei.

Sancho hian United a pan hnuah match 82 khelhsak tawhin goal 12 chiah a la khung a, assist vawi ruk a nei bawk - Dortmund-ah khan match 137 khela goal 50 khungin, assist vawi 64 a nei a, Bundesliga Team of the Season-ah vawi hnih ngawt a lang thei.

United-ah beisei a phak loh avangin Sancho hi ram tan pawh a inlan phak tawh lo a, England tan match 23 khela goal thum khungtu hi kum 2021 hnuah ram tan koh a ni leh tawh lo. World Cup 2022-ah pawh khan Three Lions tana koh zingah a tel lo a ni.