Syed Mushtaq Ali Trophy : Mizoram cricket team an chak

India rama cricket thuneitu sang ber Board of Control for Cricket in India (BCCI) hnuaia inelna, state hrang hrang leh services ten a thiam ber nih an inchuhna 2023–24 Syed Mushtaq Ali Trophy-ah Mizoramin chak ni hmel an hmu.

Nimin tlai khan Mizoram hian anmahni ang bawka North East aṭanga inlan Meghalaya chu run 20-in an hneh. Cricket Association of Mizoram (CAM) team tan an chakna hi mellung pawimawh bik zinga mi a ni.

Jaipuria Vidhyalaya Ground, Jaipur-a inkhelah ṭhum vawra vannei zawk Meghalaya lamin vawm hmasak an thlang. Mizoram tan Agni Chopra chuan ball 48 a hmachhawn aṭangin run 94 tehmeuh a siam.

Mizoram tan tualchhung tlangval Jehu Anderson pawhin ball 32 a hmachhawn aṭangin run 19 a vaw chhuak a, run 12 siamtu Joseph Lalthankhuma leh Mohit Jangra te an che ṭha bawk.

Over 20 chhunga run 163 siamin mi paruk an in hloh a, target sang pangngai tawk tak an siam. Chhattisgarh leh Baroda an hmachhawn ṭuma run siam hnem ber Thankhuma'n ni dang phak chiah lo mah se, player thawhhlawk berte zinga mi a ni leh tho.

Meghalaya lam bat (vuak) hun a thleng a, Mizo tlangval TC Vanlalremruata an ngam lo. Thingsul bowler hian Lerry, Mewada leh Junjun Sangma te a vawm out vek; Remruatdika Ralte chuan Ram-a a vawm out bawk.

Over 20 chhungin Meghalaya hian run 143 bak an siam thei lo a, mi pasarih an inhloh thung - an tum ram an thleng zo lo a, anmahni ang bawka hmar chhak team lakah an tlawm ta a ni.

Mizoram manager Joseph Lalhriatpuia chuan, "Tun tournament chu kan phur a, inelna neih hma aṭangin inbuatsaihna pawh kan nei ṭha. CAM hruaituten ruahmanna ṭha tak siamin Delhi-ah training kan nei thei a, chumi rah chu kan hmu niin ka hria.

"Kan match hmasa pahnihah khan team ṭha kan tum a, chak lo mah ila kan naute khan an khel ṭha pangngai hle. Mizo tlangval Lalhruaimawia Ralte captain-na hnuaia Meghalaya kan hneh thei hi a hluin a lawmawm takzet a ni," tiin Vanglaini a hrilh.

Mizoram hian an match hmasa lamah Chhattisgarh leh Baroda te an hmachhawn tawh a, a vanduai zawkah an ṭang ve ve. Hmarchhak aṭanga inlan zinga mi Meghalaya an hneh hian phurna nasa tak a siamsak ngeiin a rinawm.

Ocotober 21, Inrinni hian Hyderabad nen an inhmachhawn chhunzawm leh dawn a, chumi hnuah Haryana (23 October), J&K (25 Ocotber) leh Mumbai (27 Ocotber) te an la hmachhawn chhunzawm leh dawn a ni.