Neymar khup hliam an zai

Brazil forward Neymar chu a khup hliam zai a ni a, a chawlh chen tur tak hriat la ni lo mah se tuna a hliam ang hi chu thla riat aṭanga thla 10 chhung thlengte an chawlh a ngai hial ṭhin, hun rei tak chhung chu a inkhel thei dawn lo tihna a ni - Mizo forward Lallianzuala Chhangte te nen an inhmachhawn thei dawn lo!

Kum 31 mi Neymar hi World Cup qualifier khelin a feh chhuak a, an match hnuhnung bera Uruguay an hneh loh ṭumin a inhliam. Khelmual aṭangin mittui nen zawn chhuah a ni a, a awm danah kha a hliam a na tih a chiang.

A hliam endik niin zai a ngai ta hial a, a chawlh hun a rei dawn tih pawh a hriat zui. Neymar chuan, "Hun hrehawm tak a ni a, rilru pawh a na hle. Harsatna leh hrehawmna hrang hrangte ka lo paltlang tawh ṭhin.

"Tun ṭumah erawh tun hma zawng aiin ka ṭhiante leh ka chhungte ka mamawhna a zual dawn," tiin a sawi a, ni danga a hliam tawrhte aiin rilru leh taksa a nghawng na ni ngeiin a lang.

Neymar hian nipui lai khan Paris Saint Germain chhuahsanin Saudi Arabian club Al Hilal a zawm a, a club thar tan hian sulhnu ṭha a la nei mumal hman lo. Neymar hian hliam vanga thla li a chawlh hnu lawka hliam na tak a tuar leh chu hrehawm a tih thu a sawi tel bawk.

Neymar-a khelhna Al Hilal chuan October 23 zan hian Mumbai City mikhualin AFC Champions League group stage match an khel dawn a, November 6-ah Mumbai khawpuia lo zin tur an ni bawk - mahse, a hliam avangin Neymar a lo zin dawn lo niin a lang a, Mumbai player-te tan chuan a uiawm khawp ang.

Mumbai City-ah hian Lallianzuala Chhangte leh Lalengmawia Ralte (Apuia) te chu player pawimawh niin hmun pawimawh an chang ṭhin a, Mizo player-ten Neymar an hmachhawn lai kan hmu dawn ta lo.

Qatar World Cup khelh dawnah pawh khan Neymar hi a hliam a, a tir lam match hmasa pahnih a khel thei lo. A hliam dam hnuah ṭha taka khel chhoin Brazil tana goal khung hnem lamah Pele a khum hial, mahse harsatna bawkin a tlakbuak leh ta a ni.

Brazilian Football Confederation president Ednaldo Rodrigues chuan, "Brazil leh khawvela football ngaina tute tan Neymar hi a dam leh thuai a ngai, a chhan chu khelmual chhunga nuam ti taka a chet vel hian football khawvel pawh a hlim," tiin a sawi.

World Cup 2014 an khelh ṭum pawh khan, quarterfinal-a Colombia an hneh ṭumin Juan Zuniga-a'n Neymar hi a hliam a, an rama football khawmpui lian an neihah hian a inlan chhunzawm thei ta lo - tunah chuan World Cup 2016 beiseina erawh a la nung reng ang.