England fan dik takin mi an au el ngai lo - Maguire

England defender Harry Maguire chuan tun hnai khan midfielder Jordan Henderson chungchang a sawi chhuak a, England fans pangngai leh a dik tak chin chuan an player-te an au el mai mai ngai lo tih a sawi.

Liverpool captain hlui Henderson hi England leh Australia ten friendly match an khelh ṭumin auh el a ni a, tun hnaia Italy nen Euro 2024 qualifying an khelh ṭumin Three Lions fans ṭhenkhat chuan an au el bawk.

Henderson hian Reds chhuahsanin Saudi Arabian club Al Ettifaq a zawm a, a hlawh tur chu thuhran ni se mihring dikna chanvo ngaipawimawhtu tak ni se, neih inang inkawp phal lohna rama a kal hi mi tam tak chuan an hrethiam thei lo a ni.

Maguire chuan, "England fans pangngai chuan player-te an au el ngai lo. Ram tana a theihna zawng zawng hlantu leh sulhnu ṭha tak neitu hi au el tur a ni lo e, ani leh a chhungte hi au el loa zah tur an ni zawk," a ti.

Manchester United captain hlui Maguire hian ram leh club fans aṭangin auh nawmnah a tawk fo tawh a, amah anga hun hrehawm tawng ve dangte dinhmun tur chu a hriatthiampui hle.

England manager Gareth Southgate pawhin fans ṭhenkhat zinga mi auhnawmnah ching an awm chu ṭha a tih loh thu a sawi tawh a, heng mite hi ram tana a ṭha lam aia ṭha lo lam zawnga thil thlentirtu ni ang hialin a lo puh tawh bawk a ni.