Inter School Futsal-ah Home Missions an thiam ber

Mizoram Football Association (MFA) buatsaih - Neuhof School Presents Inter School Futsal Tournament 2023 chu nimin khan zawh fel a ni a, high school leh higher seconday huangah Home Missions an thiam ber.

Electric Veng YMA Indoor Stadium-a final inkhelah, high school huang hmawrbawkna neih hmasak niin Home Mission hian Mount Carmel chu 9-7 in an hneh a, inkhel hmuhnawm leh inhnehtawk takah an chungnung zawk.

Higher secondary huangah pawh school pahnih bawk hi an inhmachawn, hun pangngaiah 4-4 a an inhnehtawk hnuin penalty pet a ni a, Home Mission bawk hi 5-3 a chakin champion nomawi an chawi leh ta bawk a ni.

Inter School Futsal Tournament hi a vawi khatna a ni a, inelna buatsaihna lam chuan beisei phak bakah a hlawhtlin thu Vanglaini an hrilh. Kuminah hian champion hian printer, trophy, medal leh certificate an dawng a, pahnihnain jersey set, trophy, medal leh certificate an dawng tel bawk.

Ruahman dan chuan season tharah pawh tournament hi neih leh tura tih a ni a, middle school bakah hmeichhe inelna buatsaih tum a ni bawk.