Tonali an chhui mek

Newcastle United chuan an midfielder Sandro Tonali chu dan a bawhchhiat leh bawhchhiat loh chhui mek a ni tih an sawi a, dan phal loh thil a lo ti ngei a nih chuan hrem theih dinhmunah a ding mek a ni.

Italian Prosecutor's Office leh Italian football federation (FIGC) te chuan tun hnai khan player ṭhenkhat chu pawisa inthapnaah an inhnamhnawih tih an sawi a, dan bawhchhia ngei an ni tih finfiah tawhte chu kum khat chhung atana hrem pawh an nei tawh.

Kum 23 mi Tonali hi rinhlelh leh chhui zingah a tel a, an ram Italy tan Euro 2024 qualifier khel tura koh a nihna aṭang pawhin a lo inhnukdawk tawh a, nimin tlai thleng erawh kha chuan a thil tihsual hi finfiahna a la awm lo.

Magpies chuan thuchhuah siamin, "Sandro leh Newcastle United te chuan tunah chuan thu tam tak sawi tur kan nei rih lo. Hetiang hun a tawh mekah hian club chuan amah leh a chhungte kan thlawp tlat a ni," an ti.

Tonali bakah hian Premier League club Aston Villa player Nicolo Zaniolo pawh chhui a nih avangin Italy squad aṭangin a lo inhnukdawk tawh bawk, ani hi a dinhmun tur tak tihchian a la ni lo thung.

Juventus midfielder Nicolo Fagioli erawh dan a bawhchhe ngei tih a chiang tawh a, hei vang hian a chungah hremna lekkawh a ni tawh. Thla 12 atan hremna pek a nih bakah pawisa chawitir a ni a, heng an hrem hun chhung zinga thla nga erawh hrem lailawkna anga kalpui a ni dawn.