Inter thawnthu ngaihnawm ziaktu Mourinho

Football khawvela team ropui sawi a nih apiangin 2009-10 season-a Inter Milan team ropui kha theihnghilh theih an ni lo a, Jose Mourinho leh a nauten treble nomawi an chawi dan kha chanchin ngaihnawm a tling.

 

May 22, 2010 a ni a, Santiago Bernabeu-ah Inter Milan-in Champions League nomawi an chawi. Ni e, Serie A leh Coppa Italia-ah an champion bawk a, treble champion an ni ta. 

Fans lam hawia Diego Milito-a'n a kut phar chunga champion a lawm lai te, Javier Zanetti-a'n lawmnaa khat hmel pu chunga a lua Champions League nomawi a chhipchhuan hmel te kha - kha zan ropui hriaa en phak tan chuan theihnghilh a harsa asin. 

Stadium-ah duh ang tawkin an lawm zo a, team bus lam panin player-te an kal a, coach Mourinho erawh ama car-ah a lut zet a. A ṭhu hle hle thei lo, a rawn chhuak leh a, Marco Materazzi chu a rawn kuah chawt a, a mittui a tla. 

Aw, i chhiar dik - khami zan khan coach sual leh rorum, mi pawi sawi pawi ti lo ve tak Mourinho meuh pawh a ṭap a, a mittui erawh lawmna vanga luang a ni.

Mite duh loh kha

September 2007 khan Chelsea coach hlawhtling ber Mourinho chuan Blues a chhuahsan a, mak tih a hlawh hle - media lamah chuan 'inhriatthiam tawnna' anga inṭhen angin insawi mah se Mourinho hi 'ban' a nih ring an tam mah zawk. 

Hna nei loa a awm reng hnuah June 2008 khan Mourinho hi Inter chuan an coach ni turin an lalut a, an club chanchina dai leh tawh ngai lo tur thawnthu an ziak ṭan tih an inhre bik kher lo ang. 

Portuguese manager hian Serie A nomawi chu a season hmasa berah hian a chawi nghal mai a, league champion nih hi thil ropui tak ni mah se hei erawh hahipa sawi tur a ni lo. 

Italian football match fixing vanga an buai hlimchhawn kha a ni a, 'Calciopoli scandal' tia hriat lar buainaah hian club lian Juventus, Milan, Fiorentina leh Lazio-te chu na taka hrem zingah an tel a, Inter el tur khawpin 2008-09 ah hian an insiamrem hman lo. 

Mourinho-a'n Inter-a enkawl tirhin Porto leh Chelsea-a a lo hmingṭhat pui tawh 4-3-3 formation hman a duh avangin winger pahnih lakluh a dil a, mahse beiseina sang tak nena a lakluh pahnih Mancini leh Ricardo Quaresma-ten beisei an phak lo. 

Portuguese manager hnuaiah Inter-in Serie A nomawi chawi nghal mah se European football-ah erawh beisei ang a ni nghal bik lo. Champions League group stage-ah Greek club Panathinaikos phak loin pahnihna an ni a, last 16 an lut hram. 

Round of 16-ah hian Manchester United ngam loin European football an mangṭha zui a, Mourinho tan chuan Champions League lama an chet dan hi lu ti hai tham a ni. 

Inter-in 2008-09 season-ah Serie A nomawi bak uanpui tur an nei lo. Champions League aṭangin mualpho takin an tla a, Coppa Italia semifinal-ah an tlawm bawk. 

Mourinho hian hlawhtling turin a tlarhnung aṭanga team din a ngai tih a hria a, chumi tur chuan defensive line chu metre 20 vel tala pawh hma a duh - he a duhna ti hlawhtling thei tura a ngaih Lucio chu Bayern Munich aṭangin a lalut a, Brazilian centre back chet ranna leh thiamna chu hman ṭangkai a tum a ni. 

Inter-in buaina an la nei - an striker chhuanvawr Zlatan Ibrahimovic la turin Barcelona an lo lang a, goal 29 khungtu club top scorer hralh chu har tak a ni. Mahse, Barca-in euro maktaduai 46 bakah Samuel Eto’o pek tel an inhuam thu an hrilh a, nula buan chak lo ang maiin Inter an ṭang zo lo. 

Hetihlai hi Inter-in Diego Milito an dawr lai mek a ni bawk a, Argentine striker hi Genoa aṭangin sum leh player panga ngawt pe tel chungin an lalut. A hma lawk season-ah hian Barca chu treble champion an ni a, hei hi Inter tan vanneihna a ni daih!

Barca hlawhtlinnain Real Madrid sum bawm a sawi tel a, Madrid khaw club hian transfer bazar nghawr dawt khawpin Cristiano Ronaldo leh Kaká an lalut. Wesley Sneijder leh Arjen Robben an nghing nghal a, Inter hian Sneijder chu an lo thlem lut nghal vat. 

Mourinho-a'n a hlawhtlinpui hnu 4-3-3 hnuchhawnin 4-3-1-2-ah a inlet a, Sneijder a thiam bikna chu khelmual laiah innghah nan hman a tum. Mahse, Mourinho a hlawhchham a, Champions League-a an result chu manganthlak a ni - an match hmasa pathumah draw result vek an nei!

Mahse, vanneihna nena ṭangkawpin Inter hian Barcelona phak loa group stage-a pahnihna niin knockout round an lut hram a, an hawi kir tawh lo. Inter-ah hian Mourinho ropuina deuh lang pakhat a awm a, chu chu a duh ang taka player-te a khelhtir thei kha a ni. 

Barcelona-ah khan a laia Lionel Messi a tal tam theih zawk nan Pep Guardiola chuan Eto’o chu 'a lai' hnuchhawn turin a hrilh a, an inhmuh thiam loh phah. Mahse, Barca-a a tih duh loh hi Eto’o chuan Inter-ah Mourinho tan a ti duh tlat a, a sirah a khel. 

Mou hian season laihawlah a formation chu 4-2-3-1-ah a thlak a, thlasik transfer-ah Goran Pandev lak belhin Eto’o nen wing-ah an awm a, tlarhma lai chu Milito chanpual niin a hnung chiahah Sneijder chu a thlawptu niin a awm. 

Inter-in round of 16 an luh hnuah an ṭha telh telh a, Mourinho club hlui Chelsea an hneh nghal - quarterfinal-ah harsatna em em tawk loin CSKA Moscow an hneh zui a, semifinal-a an tum tur erawh treble champion ni lai Barcelona an ni. 

Mahse, team hlauhawm tak ni chho mek Inter lamah vanneihna a ṭang tel. Iceland-a tlang kang nasa tak avangin Barcelona hian bus-in first leg khelhna tur Milan khawpui an pan a ngai a, Inter hian 3-1 in an lo sawp. 

Nerazzurri chakna erawh 'vanneihna' hlawma puh chi a ni lo. Nou Camp-a second leg an khelh ṭumin minute 28-na lekah Thiago Motta chu hnawhchhuah a ni a, khawvela attacking ṭha ber pawl laka minute 62 goal ven chu har tak a ni. 

Minute 84-naah Gerard Pique chuan sawisel theih takin goal a rawn khung a, mahse Inter an ṭang tlang a, final an lut! Final-ah 2-0 in Bayern Munich an hneh zui a, Italian club zinga a hmasa ber ni turin Inter chu treble champion an ni. 

Mourinho finna, a thluak ṭha bik leh pressure sanga a talbuai duh lohna kha Inter Milan champion chhan a ni a, chutihruala hmuh hmaih theih loh chu Milito leh Sneijder thiam bikna kha a ni. 

Champions League final-a Milito goal hnih khung kha Sneijder ke aṭanga chhuak ve ve a ni bawk - Dutch midfielder hian goal hmasa zawk hi a assist a, goal hnihna luhna counter-attack pawh hi Sneijder-a bul ṭan a ni. 

Sneijder hian Champions League bikah hian assist vawi ruk a nei a, goal thum a khungsak bawk. Milito hian inelna hrang hrangah match 52-ah goal 30 a khung a, assist vawi ruk a nei. 

Hetihrual hian team tana Eto'o inpekna kha sawi hmaih theih a ni bik lo - Samuel Eto'o hi a khelh ngai lohna wing-ah dah a ni a, match 48-ah goal 16 a la khung tho. Hei mai a ni lo - Nou Camp-a Barcelona an hmachhawn ṭum phei chuan right back ang deuh thawin a khel hial. 

A ṭul dana tlarhnung leh defensive midfield-a captain Javier Zanetti insiamrem zel thei te, defensive midfield-a Esteban Cambiasso leh Thiago Motta te, tlarhnung lama Maicon, Lúcio leh Walter Samuel te kha nghilh an harsa. 

Semifinal second leg-a Motta hnawhchhuah a ni chunga tlarhnung an veng phui lutuk te kha pui tak a ni - Pique-a'n offside ni thei ang taka lang chunga goal a khung hma khan Júlio César chuan 'shot' hlauhawm vawi khat chiah a hmachhawn!

Bayern Munich 0 - 2 Inter Milan

INT:  Diego Milito 35', 70'

UEFA Man of the Match: Diego Milito (Inter Milan)

Fans' Man of the Match: Wesley Sneijder (Inter Milan)

Inter Milan Starting XI:

Júlio César; Maicon, Lúcio, Walter Samuel; Cristian Chivu (Stankovic 68'); Javier Zanetti (c); Esteban Cambiasso; Wesley Sneijder; Samuel Eto'o; Diego Milito (Materazzi 90+2') Goran Pandev (Muntari 79')

Substitutes: Francesco Toldo; Iván Córdoba; Marco Materazzi; Dejan Stankovic, Sulley Muntari, McDonald Marigap; Mario Balotelli

Manager: Jose Mourinho

Bayern Munich Starting XI

Hans-Jörg Butt; Philipp Lahm, Daniel Van Buyten, Martín Demichelis, Holger Badstuber; Mark van Bommel (c), Bastian Schweinsteiger; Arjen Robben, Hamit Altintop (Klose 63');  Thomas Müller, Ivica Olic (Gómez 74')

Substitutes: Michael Rensing; Andreas Gorlitz, Diego Contento, Danijel Pranjic, Anatoliy Tymoshchuk; Miroslav Klose, Mario Gómez

Manager:  Louis van Gaal

Santiago Bernabeu-a Champions League nomawi an chawi hnuah khan Mourinho hi Milan lamah a haw leh tawh lo a, Madrid-ah cham bang zuiin Real Madrid coach a ni. 

Mourinho chuan, "Khatihlai khan Real Madrid nen contract kan la ziak lo a, mahse Santiago Bernabeu pan tur khan thutlukna ka siam tawh a ni. Real khan a hmain vawi hnih min sawm a, ka hnar ve ve tawh. 

"A vawi thum nana hnar kha chu harsa ka ti ve a ni. Milan-ah kha chuan kir leh ila chuan ka ngaihdan ka thlak mai ang tih kha ka hlau a ni," a ti a, Milan-a a kir loh chhan a sawi.