Messi-a'n Barcelona pan a tum lo

Lionel Messi chuan thlasik hun a hman dan tur a sawi chiang a, a club hlui Barcelona lama loan hmanga kir leh tur anga thuthang awm chu a dik lo tih a sawi - Inter Miami tan match khelh tur a awm loh lai chuan chawlh hahdam a tum ta zawk.

Messi hian Inter Miami a zawm hnuah danglamna nasa tak a thlen. Leagues Cup a champion pui a, hei bakah hian US Open Cup final an lut tawh bawk. Mahse, Major League Soccer playoff khel turin an tling phak ta lo.

Inter Miami match hnuhnung lamah Messi hi hliam vangin a inlan thei lo a, ani bakah hian an player pawimawh ṭhenkhat an hliam. MLS playoff an khelh dawn loh avangin November leh December thla chu a hahchawl thei dawn tihna a ni.

Messi chuan, "Charlotte FC nen inkhelh hmabak kan la nei, hetah hian harsatna dang a awm a nih loh chuan ka inkhel ang. Chumi hnuah chuan November thla hian Argentina tan World Cup qualifier khelh tur pahnih kan nei dawn, chumi atan chuan ka training ang.

"World Cup qualifying a zawh hunah chuan Argentina-ah chawlh ka hmang ang. Ka inkhelh pangngai ve chinah kumin chauh hi December thla chhunga chawlh hun ka neih tam ve vawi khatna a ni dawn.

"Rilru hahdam leh engthawl takin, ka ṭhiante leh ṭhenrual ṭhate nen hun kan hmang ang. Ruahman dan chuan nakkum January thlaah season thar inbuatsaih nan training ka nei leh ang, a ṭha thei ang bera kum bul ṭan turin ka inbuatsaih dawn a ni," a ti.

Kum 36 mi Messi hian football huangah chuan a thlen theih sang ber thleng chhuakah a inngai tawh, club leh ram tan nomawi chawi theih zawng zawng a chawi kim tawh avangin a tan tih leh tur dang a awm lo anga sawi theih a ni hial.

Club tana inelna hautak leh khirh lutuk hmachhawn tawh loin, a kum a tam ve tak deuh avangin Argentina tana rilru pek nasat lehzual a duh tawh a ni. November thla hian Brazil leh Uruguay an tum dawn, hei hi a rilrua lian hmasa ber a ni ang.