Alcaraz a inhnukdawk

Mipa tennis world number 2 Carlos Alcaraz chuan kar leha khelh tur Swiss Indoors-ah a inlan theih loh tur thu a sawi, a ke vei lam hliam vangin Spanish tlangval hi inkhel turin a la inpeih rih lo a ni.

A tira ruahman dan chuan Alcaraz hian Basel khawpuia inkhelh a tum, season hmasa khan semifinal lo thleng tawhin kuminah a aia ṭha zawka chet ngei pawh a tum, mah se a tum leh duhthusam a tihlawhtling thei dawn ta rih lo.

Tournament buatsaihtu lam chuan thuchhuah siamin, "Alcaraz chuan Swiss Indoors a khelh theih loh tur thu a tichiang. Amah enkawltu doctor hnen aṭanga thu dawn danin world number 2 hi a ke vei lam a hliam mek a, a tihrawl a nat bawk avangin a inkhel thei lo," an ti.

Kum 20 mi Alcaraz hi player ṭha leh theihna nei sang a ni a, inelna lian Grand Slam huangah pawh vawi hnih a champion tawh. Mahse, hliam vanga inkhelh theih loh a nei ta fo, a theihna tipung tur leh hlawhtlinna lian chang zel tur chuan hliam neih tlem a pawimawh dawn.

Alcaraz a inlan theih loh takah chuan, major title pathum la tawh Stan Wawrinka chu main draw khel tura tih nghal a ni. A tirah chuan Wawrinka hi wildcard pek a ni tho, mahse he wildcard hi world number 159 Leandro Riedi hnenah pek leh chhawn a ni ta a ni.

Tennis season kal laiah Grand Slam inelna a zo tawh, season la khar chiah lo mah se ATP 500 tournament an la khel kual, a tawpah a ranking sang zual pariatten ATP Finals chu Turin khawpuiah an la khel leh bawk ang.