Reece James dinhmun a chiang lo

Chelsea chuan an captain Reece James an la chhawr thei rih dawn lo niin a lang. James hian training zawm ve leh tawh mah se a inhliam leh a, tun kartawpah a inkhel thei dawn em, tih a chiang ta lo.

Tun season ṭan dawn khan James hi Chelsea coach thar atana ruat a ni a, a phurin beiseina pawh a nei sang hle. Mahse, season dang ang bawkin hliamin a tlakbuak leh a, coach Mauricio Pochettino tan pawh chhawr mumal theih a la ni lo a ni.

London club hi an indin thar mek a, coach thar Pochettino-a kaihhruaina hnuaiah a tir lamah result an nei ṭha lo. Tun hnaiah erawh an insiamṭha ta viau a, an match hnuhnung berah pawh Burnley 4-1 in an hneh.

Poch-a naute hian theih ni se la chuan James ho ngeia Arsenal hmachhawn an duh ang, amaherawhchu tunah chuan James tel loa khelh dan an ngaihtuah leh rih a ngai dawn niin a lang a, a inlan thei a nih pawhin minute 90 khel tura rin chi a la ni lo ang.

England international defender James hian season hmasa khan hliam vangin inelna hrang hrangah match 24 a khel thei lo, a hliam vang bawkin England tan pawh Qatar World Cup a khel thei lo bawk.

James hian Blues tan inelna hrang hrangah match 148 a khel tawh a, goal 11 khung tawhin a ṭhiante khung tur vawi 20 a siamsak tawh bawk. September thla khan contarct ziak tharin kum 2028 thleng daih inremna an nei mek a ni.