Chak loh nei lo New Zealand

Cricket World Cup 2023-ah match li an khel tawh a, an la chak vek - an hming chu New Zealand a ni a, Nilaini khan England an hneh vanga phur tak Afghanistan chu mumang ram aṭangin an kai harh a, run 149 ngawtin an sawp.

Afghanistan hi ṭhum vawrah vannei zawkin, vawm hmasak an thlang a, over 6.3-naah New Zealand opener Devon Conway chu run 20 chiah siamin an vawm out nghal a, over 20.2-naah Rachin Ravindra chu run 32 siamin a out bawk.

England barakhaihtu Afghanistan an phur laklawh - run 54 siamtu Will Young chu Ravindra 'out' hnu lawkah a chhuak ve leh a, Daryl Mitchell phei chu run khat chiah a siam hman tihin pavilion lamah an thawn kir.

Afghanistan hian New Zealand an hneh leh mai dawn a ni ang em, tiin rilruah zawhna a awm ṭan a, run 110 chiah an siam tihin New Zealand-in wicket li an hloh fel der tawh.

Mahse, Black Caps tan Glenn Phillips leh captain Tom Latham ten mawhphurhna an lak a ṭul tih an hai lo. Phillips hian run 71 ngawt rawn vaw chhuakin Latham hian run 68 a siam a, over 50 a thlen meuh chuan New Zealand hian run 288 tlinin, wicket ruk chiah an hloh.

Afghanistan bat hun a thleng a, Chennai khawpuia inkhelah ṭhenawm ram hian batting an harsat tlat - over 25.4 an thlen meuh chuan run 97 chiah tlinin wicket li an hloh der tawh a, over 34.4-ah an vaia out vekin, run 139 chiah an siam hman!

MA Chidambaram Stadium-a inkhelah Afghanistan batter zinga run siam hnem ber Rahmat Shah chuan run 36 bak a tlin lo a, batter dang zingah run 30 siam kai an awm lo - England hneh avanga an phurna chu New Zealand lamin an tihtawpsak chiang hle.

Black Caps tan hian fast bowler Lockie Ferguson chuan over sarih a vawmah run 19 chiah pein, wicket thum a la a, Mitchell Santner chuan run 39 pein wicket thum tho a la ve bawk - over sarih a vawma run 18 chiah pe chunga wicket hnih latu Trent Boult pawhin a vawm ṭha takzet.

New Zealand-in match li an khelh tawhah hnehna an chan vek avangin semifinal beiseina a sang chhunzawm zel a, Afghanistan tan erawh match liah vawi khat chiah an la chak ve avangin thil a harsa telh telh thung.