Liverpool-in Osimhen an beisei?

Premier League club Liverpool chuan Napoli forward Victor Osimhen an enthla niin British media-te chuan an tarlang a, international break-a Nigeria tana a inkhel lai en turin scout an tir niin an sawi.

Osimhen hi Chelsea leh Arsenal pawhin lakluh tumin an hel reng a, kum 24 mi forward hi European football-a player ngaihven hlawh pawl a ni mek - Reds hian Mohamed Salah chân thei dinhmuna an din avanga thlithlai an ni tel bawk.

Nipui transfer lai khan Salah hian Saudi Arabia aṭanga sawmna a dawng a, Saudi Pro League club Al Ittihad chuan pound maktaduai 150-in an dawr. Mahse, Liverpool chuan he dawrna hi an hnar a, thlasik transfer-ah Al Ittihad hian lakluh an tum leh dawn niin an sawi.

West Ham striker Michail Antonio chuan Salah hian Saudi-a kal a pawi ti lo niin a lo sawi tawh a, "Ani chuan chhuah a pawi ti lo a, mahse, Liverpool hian an chhuah phal loh thu an hrilh a ni," a ti.

Salah hi Al Ittihad hian khawvela footballer hlawh hnem ber nihtir an huam nia sawi a ni a, nikum lawka kum thum atana contract thar ziaktu Salah hian Saudi club hi an lo lang leh a nih chuan hnar har a ti tawh mai thei.

Kum 31 mi Salah hian Liverpool tan tun season-ah match 10 khel tawhin, goal ruk a khung bakah assist vawi li a nei leh der tawh a, Reds tan an player pawimawh bera chhal ngam a la ni reng.

Osimhen hian tun season-ah match 10 khela goal ruk tho khungin, assist vawi khat a nei a, kum 24 mi chauh a la nih avangin hma hun a la nei thui viau thung.

Season hmasa Serie A-a Napoli champion puitu Osimhen hi tun hnaiah club social media lamah fiamthu thawh nana hman a nih avangin a lungawi lo a, coach Rudi Garcia nen an inkar a ṭha lo nia sawi a ni bawk - a man erawh £150mtd ai chuan tlawm lo tura ngaih a ni.