AFCON-in Premier League a nghawng dawn

African khawmualpuia ram leh ram inelna sang ber Africa Cup of Nations 2023 chu January 14, 2024-ah khelh ṭan a ni dawn a, inelna hian Fenruary 11 thleng a awh dawn - he tournament khelh lai hi international break a ni lo a, Premier League lam an chawlh dawn bawk si loh avangin English top flight league a nghawng na leh hle tura ngaih a ni.

Ivory Coast-in a thlen tur inelnaah hian Premier League club zingah Nottingham Forest chu player thawh hnem ber an nih hmel dawn a, an player chhawr rim zinga pasarih chu AFCON chhung hian an chân tura ngaih a ni.

Manchester United player pathum chu AFCON khel tura zin chhuak tura beisei an ni a, first choice goalkeeper Andre Onana leh player thar Sofyan Amrabat te chu ram tana inlan tura an zin chhuah ngei a rinawm - Tunisia midfielder Hannibal Mejbri awm loh erawh an tuar lutuk lo ang.

Liverpool tan Mohamed Salah awm lo tur hi lungngaihna tham a ni a, Tottenham Hotspur tan tun season-a an chet ṭhat chhan tia chhal ngam Pape Matar Sarr leh Yves Bissouma awm lo tur pawh uiawm a tling.

Arsenal tan nghawng na lutuk tur a awm lo niin a lang a, Mohamed Elneny leh Thomas Partey hi chuan AFCON khel pawh ni se, team a sawi danglam lutuk lo ang. Chelsea tana Nicolas Jackson awm lo tur hi Christopher Nkunku 'fit' ṭhat leh ṭhat lohin club tana a pawi thui theih dan tur chu a hril ang.

Champion lai Manchester City-in Africa lam player an neih loh avangin AFCON-in a tibuai ve dawn lo a, Premier League club langsar zingah Newcastle United chu AFCON vanga buai ve lo tur an ni bawk.