Yoell van Nieff leh Milos Drincic an hrem

India rama football thuneitu sang ber All India Football Federation (AIFF) disciplinary committee chuan Mumbai City leh Kerala Blasters inkhelh ṭuma buaina chhuak chungchang a ngaihtuah a, he inkhela red card hmu pahnih Yoell van Nieff leh Miloš Drincic te chu match thum ve ve inkhel thei lo turin an hrem.

ISL-ah team 12 an tel a, league round bikah club tinin match khelh tur an neih zat chu match 22 a ni a, match khelh tur zat awm aṭanga chhut chuan match thum khel thei lo tura inhrem hi a tam tham hle.

October 8 zana Mumbai leh Blasters inkhelh ṭum khan hun tawp hnaih lamah buaina a chhuak nasa a, yellow card pakua leh red card pahnih phawrh a ni. Buainaa bul tumtu langsar zinga mi Mumbai defensive midfielder Van Nieff leh Blasters centre back Drincic te chu red card pek an ni ve ve.

Match thum khel thei lo tura hrem an ni zui a, chutihrual chuan AIFF disciplinary committee chuan player pahnih hi hrem an nih danah an lungawi lo a nih chuan ni 10 chhung khinlet theihna hun an pe.

Mumbai tan match thum ngawt Dutch midfielder Van Nieff chhawr theih loh tur a pawi a, Blasters tan Drincic hremna hi a pawi lehzual. South Indian club hian centre back dang Marko Leskovic chu hliam vangin an chhawr thei lo mek bawk a, foreign centre back chhawr tur nei lo chungin inelna an hmachhawn a ngai dawn.

International break hman mek a nih avangin ISL pawh chawlh rih a ni a, Inrinni zan dar 8:00-ah Blasters hi inlan nghalin NorthEast United an mikhual dawn a, Mumbai City erawh October 23, Thawhṭanniah Al Hilal nen AFC Champions League group stage match an khelh dawn avangin ISL lamah chuan an inlan rih lo ang.