South Asian Games-ah India pakhatna
2016 South Asian Games (SAG) chu February 5-16 chhung khan India hmarchhaka khawpui pahnih Guwahati (Indira Gandhi Athletic Stadium) leh Shillong (Jawaharlal Nehru Stadium)-ah te neih a ni a, inelna thlengtu India chuan a pumpuiah medal 308 lain a pakhatna a ni. Kum 2019-ah neih leh tur niin Nepal khawpui Kath-mandu-ah nghah a ni ang.
SAG-ah hian ram pariat India, Sri Lanka, Pakistan, Afghanistan, Bangladesh, Nepal, Maldives leh Bhutan te an inel. Infiammi 4,000 dawn an pungkhawm a, infiamna chi hrang 22 chu peng hrang 239-ah ṭhen darh leh a ni a, heng zinga 188-ah India chuan gold a la a ni.
Sri Lanka chuan medal 186 (25 silver, 63 silver leh 98 bronze) lain pahnihna an ni a, Pakistan chuan medal 106 (12 gold, 37 silver leh 57 bronze) lain pathumna an ni bawk.
Kum 2010 SAG Dhaka-in a thlen ṭum khan India-in gold (90), silver (55) bronze (30) a vaiin medal 175 a la a, kuminaah chuan gold gold 188, silver 99, bronze 30 avaiin medal 308 laiin nasa takin hma a sawn.
South Asian Games hi
ṭum 12 neih tawh niin India hian a ṭum thum a thleng ta a, Calcutta (1987) leh Madras (1995)-ah te khan a lo thleng tawh bawk. SAG-ah India hi pakhatna a la ni fai vek a ni.
India chet ṭhatna
Infiamna chi hrang hrang zingah boxing, badminton, tennis, archery leh table tennis-ah te chuan India hian gold awm thei zawng zawng a hui fai vek.
Boxing
India boxer te an che
ṭha hle a, gold 10 awm thei chu an hui fai vek. Mipa in gold pasarih lain hmeichhiain pathum an la thung. London Olympic bronze medallist M C Mary Kom (51kg), world champion lo ni tawh L Sarita Devi (60kg) leh Asian Games bronze medallist Pooja Rani (75kg) te chu hmeichhe boxer India tana gold latu an ni.
Badminton
Badminton-ah India chhun-vawr world number 2 Saina Nehwal leh Parupalli Kashyap te inlan thei lo mah se gold pasarih bakah silver panga an la hlawh chhuak thei tho. Kum 18-a upa Ruthvika Shivani chuan hmeichhe single final-ah world number 12 PV Sindhu a hneh. Shivani hi Indian shuttler zingah chuan beisei awm pawl a rawn ni chho mek.
Wrestling
Indian wrestler an duai bik lo, gold 16 awm thei aṭangin 14 zet an hui bakah silver pahnih an la bawk. Hmeichhe wrestler an che ṭha fal a, inelna pariatah an chak fai vek a, mipa lamin gold paruk an la thung.
Table tennis
Table tennis-ah pawh India player-te an che ṭha hle, gold pasarih an lak bakah silver panga an la bawk. National champion nilai Anthony Amalraj leh Manika Batra te
chuan gold pathum ve ve an vaw chhuak.
Archery
2014 Asian Games hnua a vawi khat nan Tarundeep Rai a rawn kir leh a, ani hian thal kahah gold medal pathum kap chhukin India chuan gold medal panga awm chu an la vek a ni.
Chet fuh lohna
India ram infiamna ngaihhlut ber pakhat mipa Hockey final-ah India an chak lo a, kum 1995 hnua a vawi khat nan champion leh ngei inbeisei mah se final-ah Pakistan an hneh lo - hmeichhia erawh an champion thung.
Mipa football-ah India a chamopion zo lo a, Nepal chu 2-1 a hneh loin silver medal an dawng a ni. Hmeichhe football-ah erawh mipa tih theih loh tiin hmeichhe lamin gold an la thei.
IOA president a lawm
Indian Olympic Asso-cia-tion (IOA) president Na-rayana Ramachandran chuan, "Guwahati leh Shillong ten hnehsawh taka SAG an thleng thei hi ka lawm a, ram tana medal latute ka lawmpui rualin hlawhtling ve lote tan pawh lungngaihna tur a awm lo. Olympic kum a ni a, kum dang zawng aia ṭhaa kan infiammite an che vel hian min tihlimin beiseina min neih tir," a ti. Ramachandran hi South Asian Olympic Council president a ni bawk.
Beiseina nen
August 5 aṭang hian Brazil-ah 2016 Summer Olympic neih ṭan a ni dawn a, khawvela infiamna kutpui lian berah hian ram hrang hrang 146 aṭangin infiammi 5,412 vel an kal khawm tura ngaih a ni.
India chuan he huna tel thei tur hian theih tawpin hma a la mek a, SAG a an chet ṭhatna hian bei-seina a siam ngei tura ngaih a ni.
Medal Tally
Rank Nation Gold Silver Bronze Total
1 India 188 90 30 308
2 Sri Lanka 25 63 98 186
3 Pakistan 12 37 57 106
4 Afghanistan 7 9 19 35
5 Bangladesh 4 15 56 75
6 Nepal 3 23 34 60
7 Maldives 0 2 1 3
8 Bhutan 0 1 15 16
Total 239 239 310 788