Europa League Thlirlawkna Spurs, United leh Liverpool inlan dawn

Europe khawmualpui club-te inelna lian ber dawttu Europa League Last 32 chu zanin hian khelh a ni dawn. Eng-lish club ṭha Tottenham Hot--spurs, Manchester United leh Liver-pool te an inlan dawn avang-in ngaihven a hlawh sawt ang.

Mualphona

English club-in Europa League-ah quota pathum an nei a, chutihrualin last 32-a club pathum an kawl dan erawh mualphona a ni.

Premier League aiawha tel pathum zinga pakhat Sou-thampton-in inelna tak tak an thleng pha lo a, playoff round-ah Midtjylland an hneh lo. Danish club hi zanina Champions League group stage pawh paltlang zo lo Manchester United hmachhawn tur a ni.

Saints leh United te'n Premier League hlutna an tihniam a, Tottenham Hotspurs leh Liver-pool te erawh an awmna group hmahruaitu an ni thung.

Van Gaal Out?

Manchester United-in kar tawpah Sunderland an hneh lo a, media lam chuan United-in Louis Van Gaal thlak nan Portuguese coach Jose Mou^-rinho an lak tur thu an ziak na-sa. Dutch manager dinhmun derthawn zia lanna chu United hotu lamin Mourinho nena an indawr loh thu an sawi lo.

Van Gaal tan a hna chelh zel turin Midtjylland lakah chak result neih a ngai a, United-in tun season-a nomawi chawi an tum a nih chuan an la champion ngai lohna Europa League hi ngaihthah a thiang lo ang.

Midtjylland hi Danish Super Liga-ah pathumna an ni mek a, tun hnaia United result a ṭhat loh avangin Danish club hian an mualah club tenau zawk nih an tum lo ang.

Reds an phur

English club zinga Europe-a record nei ṭha ber Liverpool-in European competition vawi khat hmachhawnna Augsburg an khelhpui dawn.

Liverpool hi FA Cup aṭangin West Ham-in petchhuak mah se kartawp Premier League-ah Aston Villa laka goal ruk ngawt an khung avangin an phur vanglai tak a ni.

Reds tana thu lawmawm chu Aston Villa nen an in-khelh ṭumin goal nen Daniel Stur-ridge-a rawn kir a, Brazilian midfielder Philippe Coutinho-a'n a rawn let hnua a match hmasa berah West Ham lamah freekick khungin Viila lamah assist vawi hnih a nei bawk.

Liverpool-in tun season hian Europe-ah hneh loh an la tawng lo a, vawi hnih chakin vawi li an inhnehtawk. An vawi hnih chak hi German coach Jurgen Klopp hnuaiah a ni.

Bundesliga table-a 15-naa awm mek Augsburg-in an match hnuhnung berah Bayern Munich 3-1 in an hneh lo. Amaherawhchu German champion laka goal khungtu Raul Bobadilla hian Europa League-ah goal ruk khung tawhin Athletic Bilbao striker Aritz Aduriz nen top scorer an ni mek. Liverpool tlarhnung tan Paraguay international striker Bobadilla hi ven uluk a ṭul ang.

Spurs tan fiahna

Tottenham Hotspur-in kar-tawpah Manchester City an hneh a, Premier League-ah a zawnin vawi nga an chak a, champion thei zinga chhiar tel an ni. Argentine manager Mauricio Pochettino-a'n a naute a khelhtir danah fak a hlawh a, amaherawhchu Spurs boss hian fiahna tak tak a la hmachhawn lo.

Spurs hi team ṭha ni mah se an squad a chhah tawk loh avangin Europa League leh Premier League khelh kawp hi a awlai dawn lo. An vanduaina belhchhah turin an khingpui tur Fiorentina hi nikum khan last 32-ah 3-1 in an hneh tawh lo.

Fiorentina hian kartawpah Inter Milan an hneh a, point 45 hmuin Serie A-ah palina an ni mek. Italian club tan Slovenian attacking midfielder Josip Ilicic leh Croatian striker Nikola Kalinic ten league-ah goal 10 ve ve an khung tawh a, player pahnih hi inkhel tidanglam thei khawpa thiam an ni.

Inkhel tur dang

Valencia-in Inrinni zan khan La Liga-ah Espanyol an hneh a, league bikah Gary Neville hnuaia an match 10 khelha an vawi khat chakna a ni. Manchester United captain hlui hi Valencia ṭantuten bang turin an duh tawh a, club football-a a coaching career ṭan dan hi a duhawm hle.

Gary Neville-a hote hi Cham-pions League aṭanga tla thla an ni a, ani bakah hian Spanish club pathum Athletic Bilbao, Sevilla leh Villarreal an la dam bawk. Europa League champion lai Sevilla-in Norwegian club Molde an hmachhawn ang.

Europa League last 32-ah hian Bundesliga club pathum Bayer Leverkusen, Borussia Dortmund leh Schalke te an la dam a, Serie A club pathum Fiorentina, Napoli leh Lazio te inkhel hmuh tur a la awm bawk ang.

Zanin hian first leg khelh a ni dawn a, February 25 zanah second leg khelh a ni leh ang.