Chaltlang Ryders-in champion an tum

Mizoram Super League Season 1-ah Chatlang Ryders-in match 10 khelhah vawi khat chiah chak an nei a, table-ah a mawngphahah an awm. Season tharah erawh champion ngei tumin state pawn player Rachit leh Vishal Kumar Gupta bakah foreigner Nicolas Daniels an ziak lut. DR Congo player Daniels hian Ryders hi semifinal
aṭang chauhin a zawm dawn a, champion ngei an tum tih a chiang hle.

Club History

Chaltlang Ryders hi kum 1997 khan din a ni a, mipa team bakah hmeichhe team thlengin an nei ṭhin. Club bul ṭantirh hian ṭhianhoa din a ni a, kum 2001 thlengin club hi tluang taka kalpui niin nomawi an chawi nual. Amaherawhchu ṭhianhoa din a nih avangin club tan kal reng a harsa a, zirna avanga club dintute hmun danga an awm darh avangin kum 2001 khan tihtawp a ni.

Kum 2013 khan Ryders hi din thar leh a ni a, club bul
ṭantute chu player ni tawh loin club enkawltute an ni tawh a, player-te chu veng hrang hrang
aṭanga lakkhawm an ni. Chaltlang Ryders hi Mizoram Basketball Association (MBBA) hnuaiah inziak lutin Third Division-ah an champion nghal a, November 2014-ah Second Division-ah an champion leh bawk.

Second Division an champion zarah Mizoram Super League season hmasa ber khel turin an tling nghal a, division sanga tawnhriat an neih tam lohna langin season tawpah table mawngphah nichungin season an khar.

MSL1-ah hian Ryders-in Chaltlang khawtlang NGO - YMA, Local council leh Chal-tlang Sporting Club (CSC) aṭangin thlawpna ṭha tak an dawng. Ryders-in Mizoram chhunga basketball inelna sang ber MSL2 an khelh hunah hian club tana mi pawimawh Vanlalhriatzela (2004), club president hlui Zothansanga (2014) leh club hming phuahtu Lalramngaihawma (2015) te chuan thihna avangin club an uap lum thei tawh dawn lo.

Sum hmuhna

Chaltlang Ryders hi Zoplast (Chanmari), Sony Exclusive Showroom (Chanmari) leh LT Enterprise (Chaltlang) ten an sponsor a, vengchhung mi ṭha-hnem ngaite'nsum hmangin an veng club an pui bawk.

Mapuia Zote tel loin

MSL1-ah Chaltlang Ryders guard Lalmuanpuia Zote chu match 10-ah inlan kim vekin point 219 zet a khung a, season khatnaa basket ngah ber a ni. Season liam taa Ryders player
ṭha ber Ramhlun North tlangval Mapuia Zote hian Tuikual South a zawm a, MSL champion Khatla TBL-in David Lalrinchhana an chhuhsak bawk. Tlangnuam tlangval David-a hian match sarih khelh aṭangin point 65 a khung a, Ryders player zingah Mapuia Zote chiah a tluk lo.

Chaltlang Ryders coach Peter Lalrintluanga chuan, "Mapuia Zote awm loh tuar lo turin player ṭha kan la lut a, chutihrualin Mapuia hi la awm se chuan kan ṭha lehzual ang," tiin Vanglaini palai a hrilh.

Player tharte

Ryders hian VR4 aṭangin K Lalchhuanawma (Achhuana) leh Thangliana te an la lut a, Zarkawt Serpents aṭanginLalnunchama (Anggu) te an ziak lut bawk. Mizo player pathum hi team tana pawimawh tur vek an ni a, mipui ngaihven tur erawh state pawn player-te an ni.

MSL criteria-ah state dang player pahnih leh foreign player pakhat lak theih a ni a, Ryders-in an quota neih ang an hmang zo vek.

State pawn player pahnih Rachit (6ft 3in)leh Vishal (6ft 7in) ten training an zawm tawh a, India aiawhin vawi thum ve ve an feh chhuak tawh. National level-ah sulhnu an nei ṭha dun hle. Semifinal aṭanga Ryders zawm tur Nicolas Daniel (6ft 9in) hi MSL2-a foreign player awmchhun a ni.

Ryders coach Peter chuan, "Mizo player feet ruk kai chin chu an che muang a, Ranchi leh Vishal te erawh an che rang hle. Player ṭha tak ve ve an ni," tiin an player tharte a fak.