China club tana khel tur Nikica Jelavic

West Ham striker Nikica Jelavic chuan China League One club Beijing Renhe a zawm a, Croatia international man zat hi pound maktaduai 2 bawr vel nia tarlan a ni.

Kum 30-a upa striker hian tun season Premier League-ah vawi khat chiah inkhel bul a la ṭan a, nipui transfer laia Hull City aṭanga Hammers zawmtu hian tun season-ah bench aṭangin match 12 a khel a, goal khat chiah a khung.

Everton leh Glasgow Rangers tan pawha lo khel tawh Jelavic bakah hian Beijing Renhe hian player langsar tak tak an kawl nual.

Kum 2015 khan 2008-09 Bundesliga-a Wolfsburg an champion ṭuma an player pawimawh Zvjezdan Misimovic an la lut a, Hoffenheim midfielder hlui Sejad Salihovic an la lut bawk.

Beijing Renhe hi season hmasa khan team 16 inelna Chinese Super League-ah 15-na an ni a, Chinese League One club lamah tla thlain CSL lama kir leh ngei tumin ṭan an la a ni.

January transfer bazar-a sum sen nasat avangin Chinese Super League-in ngaihven a hlawh a, League One lam pawhin football khawvela player langsar tak tak an kawl nasa hle.

Senegal tan vawi 25 a inlana goal sarih khung thei Babacar Gueye chuan China League One club Shenzhen Ruby tan a khel mek a, Serbia international
ṭhin Nenad Milija leh West Ham striker hlui Frank Nouble-te chu Nei Mongol Zhongyou tan an khel a, Tianjin Quanjian F.C-in Brazil international ṭhin Jadson leh Luis Fabiano-te an nei bawk.

Wuhan Zall chuan January transfer-ah Costa Rica interna-tional Michael Barrantes leh Iceland international Solvi Otte-sen-te an la lut tawh bawk a, khawvelin China football hi a la ngaihven dawn chauh niin a lang.