PSG khelmualah Chelsea an chak lo

Chelsea-in manager lailawk Guus Hiddink-a hnuaiah an chak loh hmel hmasa ber an hmu a, khualmualah French club ṭha Paris St-Germain chu 2-1 in an hneh lo.

Parc des Princes-a inkhelah hian PSG tan Zlatan Ibrahimovic chuan freekick aṭangin goal hmahruai a khung a, Chelsea tan John Mikel Obi chuan hnai set sawt aṭanga pet goal-in a sut.

Mahse, second half-ah PSG-in goal dang an khung leh a, Angel di Maria ball pek ṭha tak chu Edinson Cavani-a'n an chakna goal ni turin a khung.

Kum 29-a upa striker goal khung hma hian Chelsea-in hmahruaina hun ṭha nei mah se Brazilian midfielder Oscar-a'n engmah loah a chantir. Blues keeper Thibaut Courtois chuan hun tawp dawna Ibrahimovic pet goal tur nia ngaih chu ṭha takin a dan sak thung.

Beisei nei Chelsea

Chak lo mah se Chelsea tan beisei erawh a la bo lo. March 9-ah second leg an khel leh dawn a, khualmualah goal khat an neih sa bawk avangin Stamford Bridge-a an inkhelh hunah 1-0 a chak an tan a tawk ang.

Team pahnih hi season thum chhung chu a zawnin Champions League last 16-ah an inhmachhawn tawh a, kum 2014-ah Chelsea an tlang a, season hmasaah erawh PSG an tlang thung.

Team pahnih

Hiddink-a'n Chelsea a enkawl hnuah match 12 chhung tlawm hmel a hmu lo a, league match 44 chhung tlawm hmel la hmu lo PSG-in an thai chhiat sak.

Dutch manager-in Ligue 1-a chak zawn rei chu thil harsa a nih loh thu inkhelh hmain a sawi a, mah se Ibrahimovic, Marco Verratti, Di Maria, Cavani leh Lucas Moura-te nei PSG hian awlsam taka hneh chi an nih lohzia an tilang.

Chelsea tan defender John Terry leh Kurt Zouma-te hliam vangin an inlan thei lo a, mah se a laia Gary Cahill leh Branislav Ivanovic-te inkawp an khel ṭha a, left-back a khel Ghana defender Baba Rahman a khel ṭha hle bawk.

Manager thukhawchang

Chelsea boss Guus Hiddink chuan, "Khualmuala goal kan khung avangin ka lawm a ni. Kan chak loh vangin lawm lo mah ila chhe taka chak lo erawh kan ni lo," a ti.

PSG-in second half-ah Uru-guay striker Cavani an luhtir a, kum 2013-a pound maktaduai 55-a French club zawmtu striker hian a team tan chakna goal a khung.

Substitute bench-a kum 20 rual Ruben Loftus-Cheek, Bertrand Traore, Kenedy leh Matt Miazga-te dahtu Hiddink chuan, "PSG nena kan inthlauhna chu bench a ni. Second half-a world class player in la luhtir thei chuan team ṭha in ni tihna a ni," tiin an khingpuite chu team ṭha zawk an nih thu a sawi.

Paris St-Germain boss Laurent Blanc chuan, "Kan khelmuala kan khel a nih chuan tlarhnungah kan fimkhur a ngai a, goal pakhat kan chhuah chuan goal hnih chhuah zel ang kan ni. Stamford Bridge-a kan inkhelh hunah goal khung ngei kan tum ang," a ti.

Inkhel dang

Thawhlehni zana Champions League last 16 inkhel dangah Benfica chuan 1-0 in an mikhual Zenit St-Petersburg an hneh a, Andre Villas-Boas-a enkawl Zenit hian March 9-ah Portuguese club hi an mikhual ve leh ang.

He inkhela goal awmchhun hi Nicolas Gaitan freekick aṭanga lokal Jonas-a'n a tauh luh a ni a, a goal khung hma hian Zenit defender Domenico Criscito chu yellow card pahnih a hmuh avangin hnawhchhuah a ni.

Brazilian striker Jonas hian kum 2014-a Valencia aṭanga Portuguese club a zawm hnu hian match 56 a inlan aṭangin goal 45 a khung tawh a, tun season-ah goal 25 a khung tawh.