Aizawl FC striker thar a lut

MPL champion Aizawl FC-in I League-ah goal khung an harsat a, buaina pumpelh turin Chanmari FC forward hlui Yinka Joel Sunday Ayeni an la lut.

I League-ah club pakhatin foreigner pali chiah an ziah luh theih avangin Aizawl FC-in Nigerian striker Joel an lakluh theih nan Japanese striker beisei pha lo Atsushi Yonezawa contract an titawp.

Aizawl FC technical director Hmingthansanga chuan, "Joel hi striker tura piang kan tih ang chi hi a ni ve a, kan beisei pawh a sang khawp mai. Chutihrualin football-ah chuan mi pakhatin team a chak pui thei lo a, team pumpui ṭanrual a pawimawh a ni," tiin Vanglaini palai a hrilh a, Japanese striker Atsu-shi nen an khelh dan hmang a inan loh hrim hrim thu a sawi tel bawk.

Joel Sunday hian nimin zing khan Aizawl FC training hmasa ber a zawm a, player tam zawk a hriat tawh avangin a tlangnel nghal hle.

Aizawl FC manager Malsawm-kima chuan, "Joel Sunday hi I League Second Division-ah khan a khel ka hmu a, ṭha ka tih zawng tak a ni. Practice hmasa berah erawh besei ang zan chuan a khel lo," tiin Vanglaini palai a hrilh.

I League kai puitu Aizawl FC boss Mala hian residential camp an neih tur thu a sawi a, Inrinnia Mumbai FC an hmachhawn hunah hmasawnna a awm ngei a beisei thu a sawi tel bawk.

Nigerian striker Joel Sunday hian 2013-14 season-a Kolkata club Kalighat MS FC tana a khelh laiin Lammualah I League Second Dvision a rawn khel tawh a, hemi season hian Calcutta Football League-ah match 22 khelin goal 18 a khung. Joel Sunday hian Chan-mari FC a zawm hmain Shillong club Rangdajied United FC tan I League a khel tawh a, Chanmari FC tan I League Second Division-ah goal 10 a khung bawk.

Aizawl FC a zawm hmain Vanglaini palaiin Joel hi a lo kawm tawh a, hemi ṭum hian Nigerian striker chuan, "Chennai-ah ka awm mek a, Aizawl FC nen kan inbe fel tawh. Ka fitness hi I League khel nghal turin a ṭha tawk," tiin a sawi.

MPL champion hian Joel Sunday an lak hma hian Khwetelhi Thopi an la lut tawh a, Naga striker erawh ṭhatpui tham player a ni lo.