Cahill-a'n Shanghai Shenhua a chhuahsan

Everton midfielder hlui Tim Cahill chu a club khelhna Shanghai Shenhua-in a contract an tihtawp sak a, Chinese Super League club a chhuahsan.

Australian midfielder hian nikum November thla khan Chinese club tan hian contract thar a ziak a, mah se manager thar Gregorio Manzano-a ruahmannaah a tel loh thu hrilh a nih avangin a chhuak dawn ta a ni.

Kum 2015-a Chinese club pantu Cahill chuan, "Shanghai Shenhua-a ka hmachhawpte ngaihtuah chuan vawiina ka chhuah-san mai a ngai ta hian mi ti lunghnur hle a ni," a ti.

Major League Soccer club New York Red Bulls tan pawha khel tawh Cahill chuan, "Ka khelhpuite leh fan-te ka mangṭha a ngai ta mai hi hreawm ka ti a, kum 2016-a Shanghai Shenhua tana ka hnawthawh tur ka lo ruahmante chu a thleng dawn ta lo," tiin Chinese club a chhuahsan tur chu pawi a tih thu a sawi.

Cahill hian Shenhua tan match 32 a khel hman a, goal 12 a khung. Mid-fielder goal khung thei tak niin Premier League club Everton tan a khelh laiin match 278 a khel a, goal 68 a khung bawk.

Chinese Super League hian January transfer-ah thawm an nei na hle a, February 26 thleng player lakluh theihna hun la neiin pound maktaduai 200 aia tam player lakluh nan an seng tawh a ni.