Vawiin aṭangin Lammualah NE Zone Santosh Trophy

Santosh Trophy North East Zone Qualifier chu vawiin aṭangin Lam­mual­ah khelh ṭan a ni dawn.

Chawhma dar 11:00-ah Assam leh Nagaland te an inkhel ang a, chawhnu dar 2:00-ah Meghalaya leh Tripura-te an inhma­chhawn ang.

Vawiin hi Group B team-te inlan hun a ni a, naktukah mipui hmuh châk Mizoram leh Manipur inkhel en tur a awm ang.

Rinkai Assam

Mizoramin 2014 San­tosh Trophy Qualifier a thlen ṭum khan North East Zone-ah Railways dah tel an ni a - Meghalaya, Assam leh Tripura te nen group khatah awmin hmarchhak aiawhin an tling. Railways hi final round-ah pawh team
ṭha ber pawl an ni zui a, final-ah Mizoram lakah 3-0 in an chak lo.

Railways awm tak lo­ah chuan Group B team zingah Assam hi rinkai ber anga ngaih theih an ni. 2014 Santosh Trophy Qualifier-ah Meghalaya tluk pha loin pathumna ni mah se qualifier hnuhnung berah hmarchhak state lian ber Assam hi Manipur, Aru­nachal Pradesh leh Nagaland ten an tluk lo. Amah­erawhchu Assam hi final round-ah Services, Punjab, West Bengal leh Maharashtra te nen group khatah dah an ni a, point an hmu lo.

Khasi an fei

Assam elpha ber tura ngaih chu hmarchhak state zinga club foot­ball-a thleng sang ber Me­ghalaya an ni. Tun season-ah Meghalaya hian I League-ah Shillong Lajong chauh nei mah se mumal taka Shillong Premier League an kalpui reng avangin state team ṭha tak hi an kawl reng.

2014 Dr TAo NE Foot­ball Championship final-ah Meghalaya hian vanduai takin Mizoram chu penalty shootout-ah an hneh lo a, nikum Santosh Trophy Qualifier-ah Mizoram vang bawkin final round an khel lo. Meghalaya hian point khat chauh an mamawh hnuah Mizoram lakah 3-0 in an tlawm a, kum 2012 hnuah final round an la khel leh lo.

Assam leh Meghalaya ten February 23 hian group match hnuhnung ber an khel dawn a, final ang hiala pawimawh ni tur chuan vawiin hian chak result an hlawhchhuah ve ve a ṭul dawn a ni.

Inkhel en man leh 'free'

Inkhel en man hi Rs 30/- a ni a, Lammual khawilaiah pawh a ṭhut theih dawn a ni.

Hetihlai hian MFA lam chuan sikul naupang uniform ha tan inkhel hi a thlawna en a phalsak a, hei bakah hian kum upa tawh kum 70 chin chunglam tan inkhel en man a ngai lo ang.

Santosh trophy Fixtures

Group A

February 19, Zirtawpni

2:00 PM Mizoram Vs Manipur

February 22, Thawhṭanni

2:00 PM Manipur Vs Mizoram

Group B

February 18, Ningani

11:00 AM Assam Vs Nagaland

02:00 PM Meghalaya Vs Tripura

February 20, Inrinni

11:00 AM Tripura Vs Assam

02:00 PM Nagaland Vs Meghalaya

February 23, Thawhlehni

11:00 AM Nagaland Vs Tripura

02:00 PM Assam Vs Meghalaya

Note : Ticket hi Rs 30 a ni ang