Rio-ah Nadal chak nuamsa

Rafael Nadal chuan nimin khan Rio Open-a a match hmasa ber a khel a, awlsam takin Pablo Carreno Busta a hneh.

Spanish thiampuipa Nadal hi Australian Open first round-ah a chak lo a, kar hmasa khan Argentina Open-ah a champion zo lo bawk. Brazil-ah champion ngei beiseiin a inkhel zui a, a match hmasa berah 6-1, 6-4 in hnehna a chang.

Grand Slam vawi 14 champion tawh Nadal hian 2008 Beijing Olympic-ah khan Spain tan gold medal a lo la tawh a, 2012 London Olympic-ah erawh hliam vangin a inlan thei lo. August thla a neih tur Rio Olympic-ah hian inlan tura beisei a ni.

Olympic chungchang an zawhna chhangin Nadal chuan, "Olympic hi infiamna kûtpui ropui tak a ni a, a special em em bawk. Rio-ah pawh ka inlan thei a nih chuan theihtawp ka chhuah ang," a ti.

Inkhel dangah seeded pahnihna David Ferrer chuan Nicolas Jarry lakah 6-3, 7-6inn hnehna a chang a, Argentina Open champion hlim Dominic Thiemchuan 6-3, 6-4 in Pablo Andujar lakah hnehna a chang bawk.