Covid-19 test result a chhuak Premier League-ah mi 2 an positive belh

Premier League-in Covid-19 test thawh hnihna result a tichhuak a, club pahnih aṭangin mi pahnih an positive. Ṭum hnihnaah hian player leh club staff mi 996 zet chu May 19, 21 leh 22 khan endik an ni a, Covid-19 vei te hi ni sarih chhung dah hran an ni ang.

Test thawh hnihnaah hian club tinin mi 40-50 an test thei tawh a, hei vang hian test hmachhawn pawh an pung. Test thawh khatna kha May 17-18 khan neih a ni a, player leh staff mi 748 endik a ni a, club pathum mi paruk an positive. Hemi ṭuma test positive te hi ni sarih chhung dah hran an nih avangin tun ṭumah hian endik an ni lo.

Premier League chuan official-in player leh staff hming an puangzar lo a, chutihrualin club leh player-te zingah puangzar an awm thung. Bournemouth chuan player pahnih positive zinga pakhat hi an player a nih thu an puang.

Cherries chuan, "Premier League dan zawmin uluk takin training ka nei a, kan nei chhunzawm zel dawn. Kar khatah vawi hnih Covid-19 test kan nei chhunzawm ang," tiin thuchhuah an siam.

Test thawh khatnaah hian Premier League club Watford aṭangin player pakhat leh staff pahnihin Covid-19 an vei tih an puangzar. Watford defender Adrian Mariappa chuan Covid-19 a vei thu a puang a, staff hming erawh an tarlang tel lo.

Burnley-in an assistant manager Ian Woan-a'n Covid-19 a vei thu an puang a, coronavirus vei dang pahnih hi an club awmna leh an hming puanzar a ni lo.

Test thawh hnihnaah mi pahnih an positive thu an puang a, Watford manager Nigel Pearson chuan an player pahnih chu an chhungte coronavirus vei aṭanga an kai thu a sawi. Watford aṭangin mi panga an positive dawn tihna a ni a, tuna Premier League thuchhuah thar mi pahnih positive erawh a ni lo.

Club captain Troy Deeney chuan a fapa hriselna avangin training hi a zawm duh lo. Watford striker Deeney chuan, "Covid-19 natna kai tur hian kan training-naah pakhatin a vei chuan a tawk a. Covid-19 hi kan chhungkuaa ken luh ka hreh a ni. Ka fapa thla nga mi hi thawk lamah harsatna a nei a, a dinhmun hi hlauhthawnawma dah ka duh lo," tiin a sawi tawh a, coronavirus vangin Hornets an buai tih phat rual a ni lo.

Covid-19 a hlauhawm a, chutihrualin Watford tan relegate a hlauhawm. Nigel Pearson hote hian match 29-ah point 27 hmuin 17-naah an awm a, relegation zone-a awm Bournemouth nen an point hmuh zat a inang chiah.

Watford hian Project Restart an thlawp lo a, training-naah pawh Covid-19 vanga harsatna tawk hmasa ber a ni bawk. Sheffield United ṭantute chuan Hornets hian relegate pumpelh nan Project Restart an thlawp lo tiin an chhuahchhal.

Hornets defender Christian Kabasele chuan, "Kan thil tum hi kan sawi ang e. Player leh staff member kai aṭangin kan la chhuak a, kar tinin Covid-19 vawi khat kan injection. Inelna ṭan a nih loh nan leh relegation pumpelh nan theihtawp kan chhuah," tiin twitter kaltlangin Blades ṭantute te a ti el.

Twitter-a Kasabele-a thuziak hi thu tak a lak chi a ni lo a, chutihrualin inelna ṭan tura Watford an inpeih loh chuan Premeir League ṭan a harsat phah ngei ang. A êng zawnga thlir erawh chuan 0.2% chiah kai thar an awm a, Premier League ṭan a nih theih nan kawng a sial chho zel e.