Champions League Roma khelmualah Zidane-a'n fiahna a paltlang
Zinedine Zidane-a'n Cham-pions League match-a team a kaihhruaina hmasa berah chak result a hlawh chhuak a, AS Roma khelmualah Real Madrid chu 2-0 in hnehna a chanpui.
Real Madrid tan Cristiano Ronaldo chuan tun season-a a goal 33-na a khung a, substitute Jese Rodriguez chuan hun tawp nan minute li chiah a awm tawh tihin goal khat dang a khung ve bawk.
Ronaldo chhanna
November 29 hnuah Ronal-do-a'n khualmualah goal a khung leh tawh lo a, Roma nen an inhmachhawn hma press conference-ah khualmuala goal a khung theih loh chhan hi zawh a ni.
Portugal captain hian media-te zawhna hi chhang duh loin press conference-a chhuahsan a, a chhanna erawh khelmual chhungah a pe thung.
Ronaldo hian minute 57-naah Real goal hmahruai a khung a, Champions League bikah khual-muala goal nga a khungna chiah a ni.
Tun season Champions League-ah goal 12 a khung tawh a, kum 2013-14 season-a goal 17 a khung phak turin goal nga chiah a mamawh tawh.
Khelmual pawnah Zidane
Kum 2002 Champions Lea-gue final-ah Zidane-a'n Bayer Leverkusen lamah goal a khung a, Champions League final-a goal ropui ber pawl a ni.
Player anga tawnhriat ngah Zidane-a'n coaching lama tawn-hriat ngah lo chungin khualmualah Real Madird a zin chhuahpui a, Italian team laka talbuai
ṭhin Real Madrid-in Roma hi an ngam hle.
Kum 29 chhunga European com-petition chanchinah Real-in Italian club an la hnawt chhuak ngai lo a, tunah erawh an sulhnu duhawm lo thaichhe turin an dinhmun a ṭha tawh hle.
Team intluk lo
AS Roma-in group stage-ah vawi khat chiah hnehna an chang a, Barcelona lakah 6-0 in an mualpho bawk. Mahse, Italian club hian an khingpuite khelh chhiat zarah last-16 an lut ta tho.
Real Madrid erawh group stage-ah ringawt pawh goal 19 an khung a, match ruk an khelhah match nga hnehna an chang thei.
Roma hi khel chhe tawp erawh an ni lo, counter attack-ah innghatin Chelsea winger hlui Mohamed Salah-a'n Real tlarhnung a chhaih buai zeuh zeuh a, Dani Carvajal-a'n penalty area-ah captain Alessandro Florenzi a tih tluk vangin penalty beisei mah se pek an ni lo bawk.
Manager thukhawchang
Real Madrid boss Zinedine Zidane chuan, "Kan khelh dan leh result avangin ka lawm a ni. Inkhel harsa tak a ni dawn a ni tih kan hre lawk a, mahse a tawp thlengin rim takin kan bei. First half-ah kan talbuai hman a, mahse hei hi chu Champions League-a thil thleng ṭhang ve mai a ni," a ti.
Zidane chuan sawi chhunzawm-in, "Cristiano kha a khel ṭha takzet a, a team-mate te pawn an khel ṭha hle. Jese-a'n goal a khung kha ka lawmpui a, goal khung hi a phu a ni," tiin Spanish rawlthar chu a fak bawk.
Roma manager Luciano Spalletti chuan, "Roma fan-te hian game lian tak tak an en fo a, kan khelh chhiat leh ṭhat chu a hretu ber an ni. Fan-te khan ka player-te an khelh ṭhat vangin kut bengin an lawm a ni," tiin chak lo mah se an khelh ṭhat thu a sawi.
Spalletti chuan, "Ka player-te khan an khel ṭha takzet a, kan vanduai mai zawk a ni. Rim taka kan thawh a ngai a, mah se kawng dik erawh kan zawh mek a ni," tiin a naute a fak.