Kar ruk chawl tur Rooney

Manchester United captain Wayne Rooney chu Sunderland nen an inhma-chhawn ṭuma a hliam vangin kar ruk vel tal a chawlh a ngai dawn a, nizan Europa League-a FC Midtjylland nen an inhmachhawnna in-khelah pawh squad-ah telh a ni lo.

United manager Louis van Gaal chuan, "Goal khung thei tak striker a nih avangin kan tan a pawimawh em em a, mahse a tel loa inkhelh kan zir a ngai dawn a ni," a ti.

Kar hmasaa Sunderland nen an inhmachhawn ṭum hian Rooney hian hliam nei chungin a khel tluan a, Stadium of Light-a a inkhel lui hi a tuar niin media ṭhenkhat chuan an tarlang.

Mahse, Van Gaal chuan, "Match tawp thleng ṭhaka khelh duh ṭhin player a ni a, na a nei chung pawn chak a duh avangin khelmual chhuahsan a duh ngai lo. Rooney-a rilru puthmang hi ṭha viau mah se a chang chuan a taksa tan a ṭha lo tih hi a hriat a ngai ve a ni," tiin Balck Cats laka Rooney a lakchhuah loh chhan a sawifiah.

England captain Rooney hian United match riat vel chu a khel thei dawn lo tihna a ni a, March chawhnu lama Germany leh Netherlands nen friendly match an khelh hunah ram tan a inlan theih a beiseiawm loh bawk.