Hei le Mission Veng Vikings

Mission Veng Vikings chuan Mizorama Basketball inelna ngaihlut ber Mizoram Super League a champion nih ngei tumin India Under 16 leh 19 captain lo ni tawh Dishant V Shah an lakluh bakah BCA captain hlui point guard Lalrinkima an la lut tawh bawka, beiseina sang tak nen February 25, Ningani aṭang khelh ṭan tur MSL2 an thlir mek a, champion an sawi ri ngam.

History

Kum 1997 khan Khatla leh Aizawla veng ṭhenkhata basket-ball lama mi ṭhahnemngai ten club hi an din a, kum 2007 aṭanga tun thlengin Zomuanpuia te chhungin an enkawl.

Mission Veng Vikings hian Mizoram Basketball Asso-cia-tion hnuaiah tun hmain inelna awm thei zawng zawngah hlawh-tlinna an lo chang vek tawh a, Sub Junior, Junior leh Men tournament-ah te an champion tawh. Mahse, MBBA hnuaia inelna lian bera ngaih MSL season khatnaah erawh palina dinhmun an hauh thung.

Vikings Nite

Zanin hian Synod conference center-ah Vikings nitehman tur a ni a, player phochhuahna hun hman tur niin club jersey tlangzarh nghal tur a ni ang. Jersey hi mipui tan leih chhuah theih a la ni dawn lo thung. Vikings hian Mission Veng mai bakah Chanmari leh Khatla-ah fans club an nei a, MSL season 2-ah ṭawiawmtu an tam a nih pawn a mak lo ang.

Vikings hian Samsung Plaza, Khiangte Trade Center (KTC), Sunrise Roller Four Mill leh Tata Motors, Zothan Motoworks
aṭangin sponsor an hmu a, anni ho bakah hian vengchhung mi ṭhahnemngaite hnen aṭangin
ṭanpuina sum an dawng bawk.

Player langsar

Mizoram Super League hmasa bera Most defensive player captain Moses Zoremmawia hi team khaidingtu tur a ni leh dawn a, Model Veng tlangval Moses bakah hian India tana lo inlan tawh 6ft 6in-a sang Dishant V Shah hi innghahna tham a ni ang.

Dishant V Shah hi age level-ah India tan player langsar a lo ni tawh ṭhin a, U16 leh 19-ah captain lo ni tawhin kum 2009 khan China-ah NBA camp a lo han chhim ve tawh bawk. Moses leh Shah bakah hian Mizo zinga shooter ṭha berte zingami Lalrina Renthlei an neih bawk avangin Vikings hian champion an sawi ri ngam hi a mak lo.

Inbuatsaihna

MSL2 khel turin Chawnpui Indoor Stadium, Hawla Indoor Stadium, Republic Vengthlang leh Babutlangah te inbuatsaihna neih ṭhin niin coach Reuben Lalchhandama leh assistant coach Lianchama Pachuau te enkawlna hnuaiah vawi 27 practice an nei tawh a ni. Player 15 ziah luh zingah hliam an awm lo.

Vikings manager H. Lal-hruai-tluanga chuan, "Season hmasa khan player naupang leh tawnhriat nei tam lo kan khawm avangin beisei angin kan hlawhtling lo a, tun season-ah erawh tun hma lama kan panna lai ti khauh turin player ṭha kan la lut a, beisei kan nei sang sawt. Mission Veng bakah Khatla leh Chanmari
aṭangin mipui thlawpna kan hmu ṭha em em a, fan-te nena ṭang hoin champion kan tum ngam a ni," tiin Vanglaini palai a hrilh.

Vikings hian MSL2-a an match hmasa ber atan February 26, Zir-tawpni tlai dar 4:00 khian Tuikual South an hmachhawn dawn a ni.