Barca chak zana record siamtu Messi

Nilaini zan La Liga inkhelah Lionel Messi-a'n goal hnih a khung a, Spanish top flight league-a goal 300 khung tling thei hmasa ber a ni ta.

Sporting Gijon khelmuala inkhelah hian Barcelona tan Luis Suarez chuan goal khat dang a khung ve bawk a, khual-mual-ah Barcelona 3-1 in an chak.

Inkhel chu

Inkhel ṭan aṭanga minute 25-na lekah Barcelona-in goal hmahruai an khung a, goal khungtu Lionel Messi-a tan La Liga-a goal 300 a khung tlinna chiah a ni.

Minute hnih a liam awrh a, beisei loh takin mualneitu lamin Carlos Castro hmangin an si phurh hi an sut. An goal chhuah vangin Barca an talbuai rei duh lo a, minute li hnuah Messi bawkin goal dang a khung leh. Argentina captain goal hnihna hi Luis Suarez siamsak a ni.

Lionel Messi-a'n penalty hmangin hat-trick siam theihna hun ṭha nei mah se Suarez a kian thung a, kar hmasa lawka a hat-trick siam theihna tura assist siamsaktu Messi duhsakna hi Liverpool striker hlui hian goal-ah a chantir thei lo.

Minute 67-naah Suarez hian goal a khung ta tho a, hun tawp thlenga goal dang a luh loh avang-in Barcelona hi 3-1 in an chak.

Inkhel chhehvel

Barcelona-in goal khung an harsat loh zia football khaw-velin hre mah se penalty-ah erawh an chhuanawm loh hle - tun season-ah penalty 15 lai chu goal-ah an chantir thei lo.

Catalan club hian league match 24 khelh tawhah point 60 hmuin La Liga table chung berah an luah mek a, an hnuai chiaha awm Atletico Madrid chuan point 54 hmuin Barca hian point rukin hma an hruai fal mek.

Barcelona hian match 31 chhung hneh loh an tawng tawh lo a, Luis Enrique-a naute hian ngamtu an tawng meuh lo.

Messi ropuina

Lionel Messi-a'n La Liga-ah match 334 a khel tawh a, goal 301 a khung. Messi goal khung zat hnaih bertu Telmo Zarra chuan Barca thiampuipa hi goal 50-in a phak lo.

Kum 1940 chhoa Athletic Bilbao striker ropui Zarra hian league match 277 a inlanah goal 251 a khung a, pathumna Cristiano Ronaldo chuan league match 224 a khelhah goal 246 a khung bawk.

Messi hian tun season-ah hliam vanga a talbuai chungin league match 19-ah goal 15 a khung leh der tawh a, inelna hrang hrangah vawi 30 inlanin goal 27 a khung.

Messi ropuina phenah Luis Suarez ropuina sawi nep theih a ni bik lo. Uruguayan striker hian tun season-ah league match 23 a khelh aṭangin goal 24 a khung a, inelna hrang hrangah match 36 inlanin goal 40 a khung tling der tawh.

Enrique thukhawchang

Gijon khawchhuak leh Spor-ting Gijon aṭanga a career ṭantu Barca manager Luis Enrique chuan, "Nipui leh Krismas apiangin Gijon khawpuiah hian chawlh hmangin ka lokal ṭhin a, he khawpui hi nuam ka ti em em a ni," a ti.

Enrique chuan inkhel chung-chang sawi chhunzawmin, "Tupawh hmachhawn ila Messi kan neih hi chuan thla a muang a, a nuam em em a ni. Suarez-a goal khan pressure na tak ata min chhanhim a ni," tiin goal khungtu pahnih a fak.

Catalan club manager chuan penalty chungchang sawiin, "Penalty pet hi kan inzir ṭhat leh a ngai tih ka pha lo. Kan penalty pet ṭhintu Luis, Messi leh Neymar-te lakah hian kan rinna erawh kan nghat tlat a, penalty pet thiam tak vek an ni," tiin penalty pet goal lotu Suarez a sawisel duh lo.