Juan Martin del Potro a dam ta

Kum khat dawn ban rek na vanga a inkhelh theih loh hnuah Juan Martin del Potro chu tennis court-ah a rawn kir leh ta a, Delray Beach Open-ah inlanin a match hmasa berah Denis Kudla chu 6-1, 6-4 in a hneh. Tukin zing dar 6:30 khan second round-ah JohnPatrick Smith a hmachhawn zui leh ang.

Kum 27-a upa Del Potro chuan, "Vawi thum ngawt ka ban rek zai a nih hnua inkhel leh thei tura ka lo kir hi ka lawm hle. Court-a ka rawn let leh hi a mak ka ti zawk hial a, ka hlimin nuam ka ti em em. Chutih rual erawh chuan hmasawmna tur erawh ka ngah hle," a ti.

Argentina tlangval hi kum 2010 January thla kha chuan ATP ranking-ah palina hial a ni hman a, mahse hliam vanga a inkhelh tam theih loh avangin tun dinhmunah chuan ranking-ah 1,041 na daih a ni.

Zin kawng hautak

• September 2009: Kum 20 mi chauh niin Del Potro-a'n US Open champion nomawi a chawi, semi­final-ah Rafael Nadal a hneh hnuin final-ah Roger Federer a hneh leh a ni.

• January 2010: Ban rek na vangin Australian Open fourth round
aṭangin a inhnukdawk.

• May 2010: A ban rek na zai a ni a, kum 2010 hian match hnih chiah a khel zui thei a ni.

• January 2011: A hliam a dam a, Hard Court tournament Sydney-ah a inlan.

• August 2012: London Olympic-ah Novak Djokovic hnehin bronze medal a dawng.

• January 2014: Australian Open second round khelh laiin a ban rek vei lam a na leh a, second round-ah a tla.

• March 2014: Kum li chhunga a vawi hnih nan a ban rek zai a ni.

• January 2015: Beiseina nen kum bul a rawn ṭan ve a, Sydney-ah inlan ve mah se a ban rek na vang bawkin Australian Open aṭangin a inhnukdawk leh.

• March 2015: Maimi Master first round-ah a chak lo a, hliam vang bawkin kum tluanin a inkhel zui tawh lo.

• February 2016: Delray Beach-ah a lo kir leh ta.