Kualmualah Wolfsburg an chak

Nilaini zan Champions League last 16 first leg inkhelah Wolfsburg chuan an zinchhuahna hmunah hnehna an va chang a, Belgium club Gent chu 3-2 in an hneh.

Ghelamco Arena-a inkhelah mikhual Wolfsburg an chungnung zawk a, winger Julian Draxler chuan minute 44 leh 54-naah goal khungin a team hma a hruai pui a, German international-in goal hnih a khung hnu hian striker Max Kruse chuan an goal thumna a khung.

Tun season Champions League match sarih an khelh tawh aṭanga goal la khung vek Gent tan mahni khelmuala goal thum chhuah leh goal khung loh hi mualphona a ni.

Amaherawhchu, an mualpho nasa lutuk tur hliah khuh nan Sven Kums leh Kalifa Coulibaly te chuan minute 80 leh 89-ah goal an khung a, March 8-a second leg an khelh hunah beiseina an nei ve leh phah ngei ang.

Wolfsburg hian tun season-ah khualmualah record an nei chhe hle, Bundesliga match 10 an zinchhuah aṭangin point ruk chauh an hlawh chhuak a, Champions League group stage-ah pawh khualmualah Manchester United leh PSV Eindhoven an hneh lo bawk. Mahse, tunah chuan an mutan pakhat chu an paltlang rih a ni.

Eng nge an sawi?

Wolfsburg coach Dieter Hec-king chuan, "Minute 80 chhung chu duhthusama ṭhain kan khel a, Max Kruse khan kan goal lina khung theihna hun ṭha a neih kha chhawr ṭangkai thei phei sela chuan a lawmawm lehzual ang. Inkhel harsatna hmunah hnehna kan chang hi a lawmawm em em. Kan khelmualah chuan tihsual kan neih a thiang lo thung ang," a ti.

Goal hnih khungtu Draxler chuan, "Goal ka khung apiang hian ka hlim ṭhin a, a bik takin ka dahsan em em Champions League-ah goal ka khung hi nuam ka ti hle. Kan khelmualah pawh ṭha taka kan khelh chhunzawm theih ka beisei," a ti.

Gent coach Hein Vanhaeze-brouck chuan, "Inkhelh a zawh meuh chuan kan result kha chhe lutuk a ni hran lo. Kan ṭhat dan berin kan khel chhuak lo tih chu a lang chiang a, kan vanneih ni chu nise goal thum khung thei chu kan ni ve tho, minute 90 dang a la awm avangin lungngaih a la hun lo," tiin a sawi.