Tlai dar 2:00-ah Mizoram Vs Manipur tum khatna
Vawiin hian Lammualah inkhel hmuhnawm bik en tur a awm dawn a, tlai dar 2:00-ah Santosh Trophy final round luh inchuhin Mizoram leh Manipur te an inkhel ang.
Santosh Trophy Qualifier North East Zone Group A-ah Arunchal Pradesh an inlan loh avangin hmarchhak football khel thiam pahnih hi ṭum hnih an inkhel dawn a, vawiin hi ṭum khatna niin February 22, Thawhṭanniah ṭum hnihna an khel leh ang.
2014 Rematch
Mizoram leh Manipur te hi kum 2014 khan Lammualah an lo intawng tawh a, hemi ṭum hian goal difference nei ṭha zawk Manipur-in draw chauh an mamawh tawh. Mizoramin inkhel thunun chungin goal an khung thei lo a, goalkeeper Premkumar Singh-a'n hun a khawhral reng bawkin avangin Lammual khat tlata mipui an mangang hman hle. Hun tawp hma minute riat chiah a awm tawhin R. Laldanmawia'n Mizoram tan goal pawimawh a khung a, injury time-ah captain Zico Zoremsanga'n chak nemnghehna goal a khung leh bawk.
Hemi kum hian Mizoramin Santosh Trophy nomawi a chawi zui a, hmarchhak state aṭangin Manipur leh Mizoram chiah hian football hmanga ram pum huap inelnaa champion thei an ni.
Chak tum Mizoram
Mizoram team enkawltuten an naute an ring tawk a, Manipur an hmachhawn ṭum khatnaah chak nghal an tum thu Vanglaini palai an hrilh.
Mizoram manager Lalbiakzuala chuan, "Theihtawp kan chhuah dawn a, chak loh chu sawi loh draw pawh kan tum lo hrim hrim. Chak tumin kan khel dawn a, 'home advatage' ṭha zawk neih theih nan Mizo mipui ṭawiawmna kan ngen tel bawk," tiin chak ngei an tum thu a sawi.
2014 Santosh Trophy-a Mizoram champion puitu manager-in beiseina sang tak a nei a, coach a danglam lo. Mizoram coach HC Zarzoliana chuan, "Team boruak a ṭha a, chu chuan kan game pawh nasa takin a pui ang. Manipur hi vawi hnih kan tum dawn a, a
ṭum hnihna awlsam nan ṭum khatnaah chak ngei ngei phawt kan tum," tiin Vanglaini palai a hrilh.
Chanmari FC coach Zara chuan, "Mizoram team a nih tawh chuan Mizo mipui team a ni a, kan vai ta a ni. Chuvangin mipui ṭawiawmna ṭha kan beisei a, Mizo football fan tawh phawt chuan Lammualah theihtawp chhuaha min rawn ṭawiawm ngei ngei pawh ka ring," a ti.
Lammualah Mizoram team-in record a nei ṭha - 2014 Santosh Trophy Qualifier-ah Mizoramin goal an chhuah lo a, goal 10 an khung. Ṭantu mipui an ṭhat zarah Lammualah tho hian kum 2014 khan Dr TAo Football-ah an champion bawk.
Ṭan tlak Mizoram team
Mizoram team hian December thla aṭangin Santosh Trophy atan hian inpuahchahna an lo nei tawh a, Hawla Indoor Stadium-ah residential camp neiin player bakah coaching staff an thawkrim hle.
Aizawl FC-in I League an khelh avangin tel lo mah se Mizoram team hi team ṭha tak an la ni. Goalkeeper-ah BVT keeper H. Lalremruata bakah tawnhriat nei ṭha Vanlalhriata te an awm a, Police keeper Hriata hi Lammuala Manipur an hneh ṭuma Mizoram goal venghimtu kha a ni.
Mizoram tlarhnungah captain Lalrinchhana Tochhawng a awm a, inpuahchahna an neih ṭhat avangin German Students National Team an hma-chhawn aiin tlarhnung a ṭha tawh zawk.
Midfield hi Mizoram ṭhatna a ni a, midfielder tawnhriat nei ṭha ONGC player Lalmuanpuia a awm tawh avangin hun harsaa talbuai mai tur an ni tawh lo. Forward-ah Malsawmfela a awm a, India ramah Chanmari FC forward aia talent nei ṭha an tam lo.
Mizoram team an ṭha a, Manipur player-te hming a langsar thung - vawiin tlai inkhel a hmuhnawm ang.
Mizoram Squad
J. No. Hming Club Position
1 H. Lalremruata Bethlehem VT Goalkeeper
36 Vanlalhriata Mizoram Police Goalkeeper
24 C. Lalrosanga Chanmari FC Centre Back
5 Lalrinchhana Tochhawng Chanmari FC Centre Back
41 Lalrinzuala Khiangte Zo United Right Back
25 Malsawma Chhangte Zo United Centre Back
3 MS Dawngzela Bethlehem VT Centre Back
6 Ramfangzauva Bethlehem VT Left Back
18 F. Lalmuanpuia ONGC, Mumbai Centre Midfielder
13 Joseph Lalnunpuia Chanmari FC Centre Midfielder
23 Laldingngheta Bethlehem VT Winger
11 Lalfakzuala Mizoram Police Winger
27 Lalmuansanga Dinthar FC Centre Midfielder
8 Lalramtharmawia Mizoram Police Centre Midfielder
47 MS Dawngliana Bethlehem VT Attacking Midfielder
17 R. Laldanmawia Chanmari FC Winger
44 Reuben Zosangpuia Chanmari FC Centre Midfielder
7 V. Lalṭanpuia Mizoram Police Centre Midfielder
10 Lalkhawpuimawia Dinthar FC Forward
22 Malsawmfela Chanmari FC Forward
Coaching Staff
HC Zarzoliana Coach Chanmari FC
Samson Ramengmawia Asst Coach Zo United
Lalthlamuana Goalkeeping Coach Chanmari FC
Lalbiakzuala Manager MFA
T. Vanlalhluna Asst Manager MFA
Babiana Lalfakzuali Physio Zo United